GettyImages © metamorworks
Tugadh an Cruinniú Mullaigh chun críche le dearbhú polaitiúil agus treochlár ina leagtar amach gníomhaíochtaí nithiúla maidir le trádáil, aeráid, fuinneamh, claochlú digiteach, slándáil bia, sláinte, oideachas, taighde agus cultúr.
I measc na dtionscnamh comhpháirteach tá:
- Líonraí níos láidre agus teicneolaíocht níos cliste: Le Líonra Sár-ríomhaireachta AE-MLC le haghaidh IS a seoladh le déanaí, nasctar lárionaid ríomhaireachta réigiúnacha ar fud an dá réigiún, le €15 mhilliún ón Aontas, ón Spáinn agus ón mBrasaíl. Ag an am céanna, leathnófar clár BELLA trí chábla snáthoptaice EllaLink idir an Eoraip agus an Bhrasaíl, rud a thabharfaidh naisc ardluais chuig Cósta Ríce agus Guatamala freisin faoi dheireadh 2025 agus a shroichfidh Meiriceá Láir, Peiriú agus Muir Chairib in 2026. Déanfaidh BEI agus CAF suas le €864 mhilliún a ghiaráil freisin agus cuirfidh siad satailít faoi úinéireacht réigiúnach ar fáil do thíortha CELAC, rud a thabharfaidh rochtain dhigiteach ar cheantair iargúlta, lena n-áirítear oileáin na hAmasóine agus Mhuir Chairib.
- Ullmhacht threisithe do thubaistí: Tá Stormwatch á sheoladh ag náisiúin an Aontais agus na Cairibe, comhpháirtíocht nua ina n-úsáidtear sonraí satailíte agus sár-ríomhaireacht an Aontais chun ullmhacht do thubaistí a neartú i bhfianaise adhaimsire atá ag dul in olcas. Leis an tionscnamh, cuirfear arduirlisí réamhaisnéise ar fáil do mheitéareolaithe sa Mhuir Chairib, le tacaíocht ó chlár Copernicus um fhaire na Cruinne de chuid an Aontais agus ó shamhaltú digiteach Destination Earth. Cuirfear Lárionad Inniúlachta Copernicus nua ar bun in Institiúid Meitéareolaíochta agus Hidreolaíochta Mhuir Chairib chun faireachán agus oiliúint aeráide áitiúil a fheabhsú. Seo cuid de na huirlisí a chuidíonn le Meabhrán AE-MLC maidir le hUllmhacht agus Bainistiú Riosca Tubaistí a chur chun feidhme. Chuir tionchar tubaisteach Hairicín Melissa béim ar a thábhachtaí atá sé oibriú ar ullmhacht agus athléimneacht ó thubaistí.
Léigh an phreaseisiúint iomlán.