Is é is aidhm don Rialachán maidir le Geobhlocáil feidhmiú an mhargaidh inmheánaigh a fheabhsú, ar líne agus as líne, trí dheireadh a chur le geobhlocáil nach bhfuil údar léi agus le cineálacha eile idirdhealaithe bunaithe ar náisiúntacht, áit chónaithe nó bunaíocht. Tarlaíonn cleachtais gheobhlocála nuair a dhéanann trádálaithe rochtain ar a gcomhéadain ar líne, amhail suíomhanna gréasáin agus aipeanna, a bhlocáil nó a shrianadh do chustaiméirí ó Bhallstáit eile atá ag iarraidh páirt a ghlacadh in idirbhearta trasteorann. Tarlaíonn sé freisin nuair a chuireann trádálaithe coinníollacha ginearálta éagsúla i bhfeidhm ag brath ar áit chónaithe, náisiúntacht nó bunaíocht na gcustaiméirí nó nuair a chuireann siad cosc ar chustaiméirí trasteorann ar bhealach eile an táirge nó an tseirbhís a cheannach nó a rochtain.
Mar chuid dá phróiseas meastóireachta caighdeánach, déanfaidh an Coimisiún measúnú féachaint ar bhain an Rialachán a chuspóirí amach go héifeachtach. Leis an nglao ar fhianaise, iarrtar ar pháirtithe leasmhara, lena n-áirítear tomhaltóirí, gnólachtaí agus údaráis náisiúnta, a dtuairimí agus a dtaithí a roinnt maidir le cur chun feidhme agus tionchar an Rialacháin.
Is príomhthosaíocht de chuid an Choimisiúin Eorpaigh é margadh inmheánach dea-fheidhmiúil a áirithiú. Cuideoidh an mheastóireacht lena chinneadh an bhfuil gá le bearta breise chun aghaidh a thabhairt ar na bacainní atá fós ann agus chun trádáil trasteorann san Aontas a neartú.
Is féidir le páirtithe leasmhara a n-aighneachtaí a chur isteach tríd an tairseach Cloisimis Uait.
Tá tuilleadh eolais faoin nGeobhlocáil agus faoin Rialachán le fáil anseo.
Last update
18 Márta 2025