Léirigh toghcháin le déanaí, lena n-áirítear toghcháin uachtaránachta agus reifreann 2024 na Moldóive, go ndíríonn gníomhaithe urchóideacha níos mó agus níos mó ar thoghcháin le feachtais chasta bhréagaisnéise agus cibirionsaithe. Féachann siad sin leis an mbonn a bhaint de shláine an phróisis toghcháin agus de chumas na saoránach páirt a ghlacadh i dtoghcháin atá saor, cothrom agus slán.
D’eagraigh Ard-Stiúrthóireacht na Líonraí Cumarsáide, an Ábhair Dhigitigh agus na Teicneolaíochta sa Choimisiún Eorpach, Aireacht Forbartha Eacnamaíche agus Digiteála na Moldóive, Toscaireacht an Aontais Eorpaigh chuig Poblacht na Moldóive agus Misean Comhpháirtíochta an Aontais Eorpaigh sa Mholdóiv ionsamhlú bagairtí hibrideacha digiteacha i gCísineá an 11 Meitheamh 2025.
Ghlac ionadaithe ó Google, Meta, agus TikTok páirt go deonach san ionsamhlúchán in éineacht le húdaráis na Moldóive, eagraíochtaí na sochaí sibhialta, seiceálaithe fíricí, na meáin neamhspleácha, chomh maith le comhpháirtithe idirnáisiúnta. Bhí sé d’aidhm ag ionsamhlú lae iomlán na gcásanna bagartha feabhas a chur ar fheasacht agus ar fhreagairt éifeachtach na ngníomhaithe ábhartha uile ar fheachtais bhréagaisnéise mhailíseacha a d’fhéadfadh a bheith ann agus ar chibirionsaithe a bhfuil sé mar aidhm leo cur isteach ar an toghchán parlaiminteach atá le teacht. Chuir an t-ionsamhlú leis an gcleachtadh ullmhachta toghcháin a rinneadh i gCísineá i mí Mheán Fómhair 2024 agus leis an tástáil struis a rinneadh le hardáin ar líne roimh thoghcháin Eorpacha 2024.
Tagann sé sin sna sála ar an imscaradh a rinne an tAontas le déanaí ar ghrúpa saineolaithe, an Fhoireann Mearfhreagartha Hibrideach, chun tacú leis an Moldóiv i gcoinne trasnaíocht eachtrach. An 20 Bealtaine 2025, thug Leas-Phríomh-Aire na Moldóive agus an Coimisiún leasú i gcrích ar chomhaontú comhlachais Chlár don Eoraip Dhigiteach na Moldóive lena gceadófar don Mholdóiv rochtain a fháil ar Chúltaca Cibearshlándála an Aontais faoin nGníomh um Chibear-Dhlúthpháirtíocht. Sa Treoirphlean maidir le Bainistiú Cibirghéarchéimeanna a glacadh le déanaí, moltar freachnaimh chomhpháirteacha de chuid an Aontais leis an Moldóiv agus le tíortha eile is iarrthóirí, i bhfianaise a nochta choitinn do chibearbhagairtí.
Fógraíodh freisin, chun tuilleadh tacaíochta a thabhairt don Mholdóiv aghaidh a thabhairt ar dhúshláin a bhaineann le trasnaíocht eachtrach agus bréagaisnéis, go mbunófar mol réigiúnach nua den Fhaireachlann Eorpach um na Meáin Dhigiteacha (EDMO). Díreoidh an mol ar bhréagaisnéis na Rúise agus cumhdóidh sé, i measc nithe eile, an Mholdóiv. Táthar ag súil go gcuirfidh sé tús lena chuid oibre go luath agus déanfaidh sé faireachán tiomnaithe freisin le linn na tréimhse toghcháin atá ar na bacáin sa Mholdóiv.
Thairis sin, mhol seirbhísí an Choimisiúin do cheithre mhórardán ar líne (Meta, Google, TikTok agus Microsoft) comhoibriú go dlúth le gníomhaithe na sochaí sibhialta agus dul i dteagmháil le Mol nua EDMO bunaithe ar rath an tsásra géaraithe shealadaigh a cuireadh chun feidhme le linn thoghcháin 2024 na Moldóive. Leis an sásra comhair, cuireadh ar a gcumas d’eagraíochtaí neamhspleácha na sochaí sibhialta aird na n-ardán ar líne a tharraingt ar ábhar atá íogair ó thaobh ama de agus a d’fhéadfadh a bheith ina bhagairt ar shláine an phróisis toghcháin sa Mholdóiv.