Is díol sásaimh don Choimisiún comhaontú cheannairí G7 maidir le Prionsabail Threoracha agus Cód Iompair maidir leis an Intleacht Shaorga

Beidh na prionsabail sin agus an Cód Iompair deonach ina gcomhlánú, ar an leibhéal idirnáisiúnta, ar na rialacha atá ceangailteach ó thaobh dlí agus atá á dtabhairt chun críche ag comhreachtóirí an Aontais faoi láthair faoin nGníomh um an Intleacht Shaorga.

Bhí Ursula von der Leyen, Uachtarán an Choimisiúin Eorpaigh, i measc na ndaoine a ghlac páirt sa ráiteas ó cheannairí G7 a d’eisigh Uachtaránacht na Seapáine ar G7 in 2023.

Seo mar a labhair an tUachtarán von der Leyen:

Is mór na buntáistí a d’fhéadfadh a bheith ag baint leis an intleacht shaorga do shaoránaigh agus don gheilleagar. Mar sin féin, tá dúshláin nua ag gabháil leis an dlús atá curtha le hacmhainneacht na hintleachta saorga freisin. Ina cheannródaí rialála cheana féin leis an nGníomh um an Intleacht Shaorga, tá an tAontas ag cur le ráillí cosanta IS agus leis an rialachas ar an leibhéal domhanda freisin. Is cúis áthais dom fáilte a chur roimh Phrionsabail Threoracha idirnáisiúnta G7 agus roimh an gCód Iompair deonach, lena léirítear luachanna an Aontais chun IS iontaofa a chur chun cinn. Iarraim ar fhorbróirí IS an Cód Iompair seo a shíniú agus a chur chun feidhme a luaithe is féidir.

Léigh an phreaseisiúint iomlán.