Spreagann Eoraip na Cruthaitheachta na billiúin infheistíochtaí agus cuireann sí le hinfheictheacht shaothair an Aontais

Leagtar amach na torthaí sin sa tuarascáil a ghlac an Coimisiún ina ndéantar meastóireacht ar dheich mbliana d’Eoraip na Cruthaitheachta, clár suaitheanta cistiúcháin an Aontais don chultúr agus do na meáin.

Ó thaobh na meán de, bhí scannáin agus sraitheanna Eorpacha a dtacaíonn an tsraith MEDIA leo i bhfad níos inrochtana tríd an teilifís, trí phictiúrlanna agus trí fhíseán ar éileamh, de réir tosca 9.5, 6.6 agus 3.2 uair faoi seach, i gcomparáid le saothair chomhchosúla de chuid an Aontais nach dtacaíonn MEDIA leo.

Ag an am céanna, thacaigh snáithe Cultúir an chláir le breis agus 1,800 tionscadal a raibh 6,700 eagraíocht páirteach iontu agus mhaoinigh sé beagnach 500,000 lá soghluaisteachta d’ealaíontóirí agus do ghairmithe cultúir, rud a chuidigh lena saothair a bheith i gcúrsaíocht lasmuigh de theorainneacha náisiúnta agus teanga.

Le Saoráid Ráthaíochta Earnálacha an Chultúir agus na Cruthaitheachta, a cuireadh chun feidhme in éineacht leis an gCiste Eorpach Infheistíochta, giaráladh beagnach €2 bhilliún in iasachtaí agus laghdaíodh an t-easnamh rochtana ar mhaoiniú fiachais suas le 30 %. Leis an rath a bhí air, réitíodh an bealach chun ionstraim chothromais a sheoladh don earnáil chlosamhairc - MediaInvest.

In 2021, chuir Eoraip na Cruthaitheachta tús freisin le tionscadail meán nuachta ardcháilíochta a chistiú chun neamhspleáchas, iolrachas agus litearthacht sna meáin a chur chun cinn.

Amach anseo, cuireadh i dtábhacht sa tuarascáil go bhfuil cistiú ríthábhachtach chun leanúint de thacaíocht a thabhairt do riachtanais na meán agus earnálacha an chultúir agus na cruthaitheachta chun leas iomlán a bhaint as a n-acmhainneacht agus chun leanúint de bheith ag oiriúnú do na dúshláin shuntasacha mhargaidh, theicneolaíocha agus eile atá rompu, agus rochtain ar éagsúlacht ábhair chultúrtha a leathnú thar theorainneacha ag an am céanna.

Cumhdaítear sa tuarascáil an mheastóireacht deiridh ar chlár 2014-2020 agus an mheastóireacht mheántéarma ar an gclár reatha.