An 26 agus an 27 Bealtaine, rinne an Coimisiún Eorpach comóradh 20 bliain ar an bhfearann barrleibhéil .eu ag Idirphlé Eorpach maidir le Rialachas Idirlín 2026 (EuroDIG).
Sa lá atá inniu ann, agus é ar an gceathrú fearann barrleibhéil cód tíre is mó san Eoraip, le 3.8 milliún clárúchán, léiríonn .eu tiomantas na hEorpa d’idirlíon oscailte, slán, domhanda agus idir-inoibritheach. De réir mar a fhilleann EuroDIG ar an mBruiséil den chéad uair le deich mbliana anuas, tiocfaidh os cionn 800 geallsealbhóir, ó lucht déanta beartas go rialachas idirlín go baill theicniúla den phobal le chéile chun guthanna Eorpacha a thaispeáint agus chun dul i mbun idirphlé maidir le todhchaí an idirlín.
Is ionann an t-imeacht agus glao chun gnímh ar Fhearainn Barrleibhéil na gcód tíre Eorpach, ar na Ballstáit agus ar an tsochaí shibhialta chun a ról in idirphlé domhanda maidir le rialachas idirlín a neartú, lena n-áiritheofar go mbeidh luachanna na hEorpa – cearta an duine, cuimsitheacht agus iomaíocht – ina dtreoir do na deich mbliana amach romhainn. Agus a áirithiú ag an am céanna go leanfaidh .eu de bheith ag feidhmiú mar phríomhghné den fhéiniúlacht uile-Eorpach ar líne.
Ag labhairt dó ag an ócáid, chuir an Leas-Uachtarán Feidhmiúcháin um Cheannasacht Theicneolaíoch, Slándáil agus Daonlathas, Henna Virkkunen, i bhfios go láidir go seasann an Eoraip ag tráth cinniúnach - tráth nach mór neamhspleáchas digiteach, spleáchais laghdaithe agus ceannaireacht dhomhanda i rialachas idirlín a bheith fite fuaite ina chéile.
“Breithlá sona, .eu! Ó shiombail d’aontacht na hEorpa go rabhchán muiníne agus nuálaíochta, níor lig .eu síos riamh sinn. Cruthaítear leis gur féidir leis an Eoraip bonneagar digiteach ceannasach iomaíoch a thógáil agus, ag an am céanna, a bheith dílis don tsamhail il-gheallsealbhóra a choinníonn an t-idirlíon ar oscailt agus ar fud an domhain.”
Deich mBliana Nua don Rialachas Idirlín: Fís na hEorpa
Tagann an ceiliúradh 20 bliain de .eu ag pointe criticiúil. Tar éis Chruinniú Mullaigh Domhanda na Náisiún Aontaithe maidir leis an tSochaí Faisnéise +20 i mí na Nollag 2025, tá an Eoraip ar tí a bheith ina guth láidir lena múnlófar na deich mbliana amach romhainn de Rialachas Idirlín.
Leag an Leas-Uachtarán Feidhmiúcháin béim ar a thábhachtaí atá sé tacú le hidirlíon díláraithe oscailte inar féidir le deiseanna a bheith faoi bhláth agus ina bhfuil fíorroghanna malartacha agus smacht ag úsáideoirí - bídís ina ngnólachtaí, ina rialtais nó ina ndaoine - ar a gcinniúint dhigiteach.
Cuireann rath .eu béim ar thábhacht na físe seo. Ó seoladh é an 7 Aibreán 2006, tá sé ag feidhmiú gan aon éaradh amháin, rud a léiríonn athléimneacht agus iontaofacht bhonneagar digiteach na hEorpa. Agus é ag dul isteach sa tríú deich mbliana anois, leanfaidh .eu de cheannasacht dhigiteach na hEorpa a neartú agus de thacaíocht a thabhairt don Mhargadh Aonair, rud a fhágfaidh go mbeidh sé níos éasca do ghnólachtaí oibriú thar theorainneacha.
Tacófar a thuilleadh leis an bhfís sin leis an bPacáiste Ceannasachta Teicneolaíche atá ar na bacáin.
Léigh tuilleadh faoin bhfearann barrleibhéil .eu.