© RAZBIAKTER AdobeStock
Rinne an Coimisiún meastóireacht ar Threoir Marrakech (Treoir 2017/1564) agus ar Rialachán Marrakech a ghabhann léi (Rialachán 2017/1563), mar a cheanglaítear le hAirteagal 10(1) de Threoir Marrakech agus le hAirteagal 7 de Rialachán Marrakech, agus d’fhoilsigh sé tuarascáil agus doiciméad inmheánach oibre a ghabhann léi. Is cuid de reachtaíocht cóipchirt an Aontais iad na hionstraimí sin agus is é is aidhm dóibh rochtain ar leabhair agus ar ábhair chlóite i bhformáid inrochtana a éascú do dhaoine dalla, do dhaoine lagamhairc nó do dhaoine atá faoi mhíchumas léitheoireachta cló ar bhealach eile. Rinneadh measúnú sa mheastóireacht ar a mhéid a bhain na hionstraimí sin a gcuspóirí amach, i bhfianaise éifeachtacht, éifeachtúlacht, ábharthacht agus comhleanúnachas an chreata agus bhreisluach AE.
Ar an iomlán, bhí feidhmíocht Threoir agus Rialachán Marrakech ag teacht leis na hionchais. I bhfianaise eisceachtaí cóipchirt náisiúnta atá ann cheana ach atá éagsúil ar mhaithe le daoine faoi mhíchumas, chuir ionstraimí an Aontais feabhas ar dheimhneacht dhlíthiúil agus ar infhaighteacht cóipeanna i bhformáid inrochtana, lena n-áirítear cóipeanna trasteorann, trí shoiléiriú a dhéanamh ar na húsáidí agus na tairbhithe a chumhdaítear le rialacha cóipchirt an Aontais. I bhfianaise thorthaí na meastóireachta, meastar nach bhfuil údar le haon leasú ag an gcéim seo.
Baineadh leas as staidéar tacaíochta sa mheastóireacht, inar bailíodh sonraí bunaithe ar thaighde deisce agus ar ghníomhaíochtaí comhairliúcháin leis na Ballstáit agus le páirtithe leasmhara. Fuarthas tuairimí na bpáirtithe leasmhara freisin trí ghlao ar fhianaise. Tugadh aghaidh sna gníomhaíochtaí comhairliúcháin go háirithe ar eagraíochtaí a dhéanann ionadaíocht ar dhaoine faoi mhíchumas, ar eintitis údaraithe, agus ar pháirtithe leasmhara in earnáil na foilsitheoireachta.
Cúlra
Is é is aidhm do Threoir Marrakech agus do Rialachán Marrakech infhaighteacht cóipeanna de leabhair agus d’ábhar clóite eile i bhformáidí inrochtana a mhéadú chun leasa daoine faoi mhíchumas a bhaineann le priontáil. Tá sé d’aidhm ag ionstraimí an Aontais freisin feabhas a chur ar chúrsaíocht cóipeanna i bhformáid inrochtana den sórt sin thar theorainneacha.
Leis na hionstraimí reachtacha sin, rinneadh na hoiriúnuithe ba ghá ar dhlí cóipchirt an Aontais tar éis aontachas an Aontais Eorpaigh le Conradh Marrakech EDMI 2013 maidir le rochtain ar shaothair fhoilsithe a éascú do dhaoine dalla, do dhaoine lagamhairc nó dóibh siúd atá faoi mhíchumas léitheoireachta cló ar aon bhealach eile.