GettyImages © Dragon Claws
Is bonneagair chriticiúla iad líonraí cnámh droma, lena n-áirítear cáblaí fomhuirí, a bhfuil ról ríthábhachtach acu maidir le nascacht ardtoillte a áirithiú chomh maith le hathléimneacht agus slándáil na nascachta digití a fheabhsú, mar a cuireadh i bhfios go láidir sa tuarascáil Safer Together. Thairis sin, sa Pháipéar Bán maidir le conas máistreacht a fháil ar riachtanais bhonneagair dhigitigh na hEorpa agus sa Mholadh maidir le slándáil agus athléimneacht bonneagar cáblaí fomhuirí, leag an Coimisiún amach gníomhaíochtaí sonracha chun comhordú idir an tAontas agus a Bhallstáit a mheasúnú agus a fheabhsú a mhéid a bhaineann le slándáil agus athléimneacht bonneagar cáblaí fomhuirí atá ann cheana agus bonneagar cáblaí fomhuirí nua. Áirítear leis sin cáblaí agus na rioscaí gaolmhara a mhapáil. Tá SCE Digiteach ar cheann de na hionstraimí cistiúcháin a luaitear sa Mholadh chun tacú le tionscadail cáblaí straitéiseacha a chur in úsáid.
Cuirfidh na tionscadail a mhaoineofar faoin tríú sraith de ghlaonna SCE Digiteach go mór le borradh a chur faoi naisc dhomhanda idir an Eoraip agus an Afraic (e.g. tionscadail Medusa na hAfraice nó Canalink-Maracó), an Meánoirthear (e.g. tionscadal BlueMed East) agus an Áise (nascacht Artach), chomh maith leis an nasc idir na Ballstáit sa Mheánmhuir, san Atlantach, i Muir Bhailt agus i Mór-Roinn na hEorpa (lena n-áirítear Lár agus Oirthear na hEorpa) a threisiú.
Tá tuilleadh eolais faoi na tionscadail forbartha cáblaí le fáil san Iarscríbhinn (PDF).
Tacóidh na tionscadail nua freisin leis an nascacht sna Réigiúin is Forimeallaí agus sna Tíortha agus Críocha Thar Lear, amhail san Aigéan Ciúin (e.g. tionscadal NUANUA), sa Mhuir Chairib (e.g. tionscadal BCA), sna hOileáin Chanáracha (e.g. tionscadal PENCAN-X) agus i limistéar Azores-Madeira (e.g. tionscadal CAM an Atlantaigh — CM).
Is eintitis faoi rialú an Aontais iad tairbhithe uile dheontais SCE agus tógtar na cáblaí a úsáidfear le teicneolaíocht shlán. Chomh maith le tarchur slán teiribhirt sonraí in aghaidh an tsoicind a ráthú, áirítear i mbeagnach gach cábla cistithe teicneolaíochtaí SMART, a fheidhmíonn mar bhraiteoirí geografacha móra chun faireachán a dhéanamh ar ghníomhaíochtaí in aice láimhe, ag gníomhú dóibh mar chórais réamhrabhaidh chun an bonneagar féin a chosaint.
Leis an dara Clár Oibre Digiteach de chuid SCE 2024-2027, cuirtear EUR 542 mhilliún breise ar fáil chun tionscadail nascachta cnámh droma a chomhchistiú, rud a chiallaíonn go mbeidh beagnach 1 bhilliún i gceist le pleananna infheistíochta an Aontais sna bonneagair chriticiúla sin thar an gcreat airgeadais reatha. Tá an ceathrú glao faoin dara SCE Digiteach ar oscailt le haghaidh aighneachtaí faoi láthair go dtí an 13 Feabhra 2025.