Glao comhpháirteach ar spéis chun páirt a ghlacadh sa Chód Cleachtais maidir le Bréagaisnéis

Tá an Glao dírithe ar réimse leathan páirtithe leasmhara, lena n-áirítear soláthraithe seirbhísí ar líne a ghlacann páirt i scaipeadh ábhair ar an bpobal amhail na meáin shóisialta nó seirbhísí cuardaigh, feidhmchláir teachtaireachtaí príobháideacha, páirtithe leasmhara ón earnáil fógraíochta agus gníomhaithe eile a sholáthraíonn seirbhísí a d’fhéadfaí a úsáid chun luach airgid a chur ar an mbréagaisnéis. D’fhéadfadh páirtithe leasmhara a chuidíonn le dul i ngleic le scaipeadh na bréagaisnéise trína n-uirlisí, iarrachtaí teicniúla, obair dhaonchairdiúil nó saineolas sonrach a bheith ina sínitheoirí freisin.

I measc na ndreasachtaí chun dul isteach sa Chód Cleachtais maidir le Bréagaisnéis tá: a bheith mar chuid de chreat uile-Aontais, nuálach agus láidir a bhfuil sé mar aidhm leis coimircí iomchuí a chur ar fáil d’úsáideoirí maidir le mí-úsáid seirbhísí ar líne chun bréagaisnéis a scaipeadh. Is féidir le sínitheoirí tairbhe a bhaint as dea-chleachtais a roinnt agus sineirgí féideartha a bhunú le seirbhísí sínitheoirí eile. Cuirfidh rannpháirtíocht sa Chód le sláine fhoriomlán, inchreidteacht agus íomhá phoiblí na sínitheoirí, rud a thabharfaidh cosaint freisin ar dhamáiste do chlú a eascraíonn as na rioscaí a bhaineann le scaipeadh na bréagaisnéise.  Ina theannta sin, bainfidh ardáin an-mhór tairbhe freisin as páirt a ghlacadh sa Chód neartaithe in oirchill oibleagáidí nua is infheidhme maidir leo faoin nGníomh um Sheirbhísí Digiteacha (DSA) atá beartaithe, go háirithe maidir le measúnú riosca, maolú riosca, cumhachtú úsáideoirí, agus trédhearcacht maidir le fógraíocht.

Táthar ag súil go ndéanfaidh sínitheoirí nua an Cód athbhreithnithe a chomhchruthú in éineacht leis na sínitheoirí reatha maidir le dréachtú na ngealltanas a bhaineann lena seirbhísí agus maidir leis na gealltanais sin a ghlacadh.

Iarrtar ar shínitheoirí nua a n-iarratas a chur isteach faoin 15 Samhain ar a dhéanaí, chun an próiseas agus seachadadh an Chóid nua a éascú laistigh den tréimhse ama a bhfuiltear ag súil leis. Tar éis an dáta sin, bheadh páirtithe leasmhara fós in ann páirt a ghlacadh sa Chód agus gealltanais ábhartha an Chóid a ghlacadh a luaithe a bheidh sé tugtha chun críche agus oscailte lena shíniú, ach ní bheadh siad in ann páirt a ghlacadh i ndréachtú an Chóid a thuilleadh.

Déantar obair leantach sa Ghlao seo ar Threoir an Choimisiúin maidir leis an gCód Cleachtais maidir le Bréagaisnéis a Neartú, a foilsíodh an 26 Bealtaine 2021 ina moltar rannpháirtíocht níos leithne sa Chód chun freagairt níos cuimsithí agus níos comhordaithe a dhéanamh de ar scaipeadh na bréagaisnéise. Moltar do pháirtithe leasmhara a n-iarratais a chur isteach a luaithe is féidir chun páirt a ghlacadh i ndréachtú an Chóid nua ó chéim luath.