An Fhaireachlann Eorpach um na Meáin Dhigiteacha (EDMO)

Feidhmíonn an Fhaireachlann Eorpach um na Meáin Dhigiteacha (EDMO) mar mhol do sheiceálaithe fíricí, d’acadóirí agus do pháirtithe leasmhara ábhartha eile chun comhoibriú le chéile. Spreagann sé iad chun nasc gníomhach a dhéanamh le heagraíochtaí meán, saineolaithe ar litearthacht sna meáin, agus tacaíocht a chur ar fáil do lucht déanta beartas. Cuidíonn sé sin le gníomhaíochtaí a chomhordú sa chomhrac i gcoinne na bréagaisnéise.

Tá gníomhaíochtaí EDMO bunaithe ar chúig shraith:

1. eagraíochtaí seiceála fíricí san Eoraip amhapáil agus tacú leo trí ghníomhaíochtaí comhpháirteacha agus trasteorann agus modúil oiliúna thiomnaithe a chothú.
2. gníomhaíochtaí taighde maidir leis an mbréagaisnéis ar an leibhéal Eorpach a mhapáil, tacú leo agus iad a chomhordú, lena n-áirítear stór domhanda d’ailt eolaíochta phiarmheasúnaithe maidir leis an mbréagaisnéis a chruthú agus a nuashonrú go rialta.
3. tairseach phoiblí a thógáil ar a gcuirfear faisnéis agus ábhair ar fáil do chleachtóirí meán, do mhúinteoirí agus do shaoránaigh atá dírithe ar fheasacht a mhéadú, athléimneacht i gcoinne bréagaisnéise ar líne a chothú agus tacú le feachtais litearthachta sna meáin.
4. creat a cheapadh chun rochtain shlán atá cosanta ó thaobh príobháideachais de ar shonraí ardáin a áirithiú do thaighdeoirí acadúla atá ag obair chun tuiscint níos fearr a fháil ar bhréagaisnéis.
5. tacaíocht d’údaráis phoiblí chun faireachán a dhéanamh ar na beartais a chuir ardáin ar líne i bhfeidhm chun leathadh agus tionchar na bréagaisnéise a theorannú.

Tógfaidh EDMO a phríomhghnéithe in dhá chéim. Díreoidh an chéad chéim ar bhonneagar croísheirbhíse a imscaradh agus saineofar rialacha rialachais na Faireachlainne. Leis an dara ceann, bunófar moil taighde meán digiteach náisiúnta agus réigiúnacha EDMO ar fud an Aontais.

Cuireadh tús leis an dara céim de EDMO nuair a seoladh 8 mol a maoiníodh le breis agus EUR 11 mhilliún tríd an tSaoráid um Chónascadh na hEorpa, rud a chuideoidh le hobair EDMO a chur chun feidhme agus a leathnú. Is é is aidhm dóibh gníomhaíochtaí a chur i bhfeidhm chun cur le cumas EDMO dul i ngleic le feachtais bhréagaisnéise dhíobhálacha ar an leibhéal náisiúnta agus ar leibhéal an Aontais, agus anailís a dhéanamh ar a dtionchar ar an tsochaí agus ar an daonlathas. Roghnaíodh na moil tar éis sheoladh an dara glao ar thograí chun síneadh a chur le raon feidhme na Faireachlainne Eorpaí um na Meáin Dhigiteacha (EDMO) i mí an Mheithimh 2020.

Rialachas

Tá EDMO á bhainistiú ag cuibhreannas faoi stiúir Institiúid Ollscoile na hEorpa i bhFlórans na hIodáile. Áirítear ar an gcuibhreannas an chuideachta Ionad Teicneolaíochta na hAithne ón nGréig, Ollscoil Aahrus ón Danmhairg, agus an eagraíocht seiceála fíricí Pagella Politica ón Iodáil.

Tá struchtúr rialachais ag EDMO atá go hiomlán neamhspleách ar údaráis phoiblí, lena n-áirítear an Coimisiún Eorpach. Tá an struchtúr rialachais comhdhéanta de bhord comhairleach a bhfuil sé de chúram air rialacha feidhmiúla agus straitéis na Faireachlainne a shainiú agus bord feidhmiúcháin atá freagrach as an gconradh a chur chun feidhme i gcomhairle leis an mbord comhairleach.

Cúlra

Tá cruthú na Faireachlainne ar cheann de na gnéithe i bplean gníomhaíochta mionsonraithe an Choimisiúin i gcoinne na bréagaisnéise, a foilsíodh i mí na Nollag 2018. Is é is aidhm don phlean cumais a threisiú agus comhar idir na Ballstáit agus an tAontas a neartú i gceithre phríomhréimse:

1. feabhas a chur ar bhrath
2. freagairtí a chomhordú
3. ag obair le hardáin ar líne agus le tionscal
4. feasacht a mhúscailt agus saoránaigh a chumhachtú chun freagairt don bhréagaisnéis ar líne

Sheol an Coimisiún an dara glao ar thograí chun síneadh a chur le raon feidhme na Faireachlainne Eorpaí um na Meáin Dhigiteacha (EDMO) i mí an Mheithimh 2020. Leis an dara céim den tionscadal, maoinítear moil thaighde meán digiteach náisiúnta agus ilnáisiúnta a chruthú ar fud na hEorpa le EUR 11 mhilliún tríd an tSaoráid um Chónascadh na hEorpa.

Sheol an Coimisiún an chéad ghlao ar thairiscintí chun an Fhaireachlann Eorpach um na Meáin Dhigiteacha a chruthú in 2019. Bhuaigh cuibhreannas faoi stiúir na hInstitiúide Ollscoile Eorpaí i bhFlórans an glao ar thairiscintí, lena n-áirítear suas le EUR 2.5 milliún.