An Comhshocrú maidir leis an Intleacht Shaorga

Tháinig an Gníomh um an Intleacht Shaorga i bhfeidhm an 1 Lúnasa 2024. Tá roinnt forálacha den Ghníomh um an Intleacht Shaorga infheidhme go hiomlán cheana féin. Mar sin féin, ní bheidh roinnt ceanglas maidir leis na córais intleachta saorga ardriosca agus forálacha eile infheidhme ach amháin ag deireadh idirthréimhse (i.e. an t-am idir teacht i bhfeidhm agus dáta na hinfheidhmeachta). 

Sa chomhthéacs sin, tá an Comhshocrú um an Intleacht Shaorga á chur chun cinn ag an gCoimisiún, chun cabhrú le páirtithe leasmhara ullmhú do chur chun feidhme an Ghnímh um an Intleacht Shaorga. Tá an Comhshocrú um an Intleacht Shaorga bunaithe ar dhá cholún.

Colún I: líonra an Chomhshocraithe um an Intleacht Shaorga a bhailiú agus a mhalartú

Tá Colún I oscailte do gach páirtí leasmhar (lena n-áirítear cuideachtaí, eagraíochtaí neamhbhrabúis, acadóirí, státseirbhísigh, etc., ach gan a bheith teoranta dóibh sin amháin). Faoi Cholún I, rannchuidíonn rannpháirtithe le pobal comhoibríoch a chruthú, agus a dtaithí agus a n-eolas á gcomhroinnt acu. Áirítear leis sin seimineáir ghréasáin arna n-eagrú ag an Oifig um Intleacht Shaorga lena dtugtar tuiscint níos fearr do rannpháirtithe ar an nGníomh um an Intleacht Shaorga, ar a bhfreagrachtaí agus ar an gcaoi le hullmhú dá chur chun feidhme. Dá réir sin, bailíonn an Oifig um Intleacht Shaorga léargais ar dhea-chleachtais agus ar dhúshláin atá os comhair na rannpháirtithe.

Sa chomhthéacs sin, is féidir le rannpháirtithe dea-chleachtais agus beartais inmheánacha a chomhroinnt a d’fhéadfadh a bheith úsáideach do dhaoine eile ina dturas comhlíontachta. Ag brath ar roghanna na rannpháirtithe, féadfar na dea-chleachtais sin a fhoilsiú ar líne freisin ar ardán ina roinnfidh an Oifig um Intleacht Shaorga faisnéis maidir le próiseas cur chun feidhme an Ghnímh um an Intleacht Shaorga.

Colún II: gealltanais chuideachta a éascú agus a chur in iúl

Is é is cuspóir don cholún seo creat a chur ar fáil chun cur chun feidhme luath roinnt de bhearta an Ghnímh um an Intleacht Shaorga a chothú. Leis an tionscnamh seo, spreagtar eagraíochtaí chun na próisis agus na cleachtais atá á gcur chun feidhme acu a nochtadh go réamhghníomhach chun comhlíontacht a réamh-mheas. Go sonrach, is féidir le cuideachtaí a sholáthraíonn nó a úsáideann córais intleachta saorga a ngealltanais dheonacha i leith ceanglais trédhearcachta agus ardriosca a léiriú agus a chomhroinnt agus ullmhú go luath dá gcur chun feidhme.

Is i bhfoirm gealltanas ar ‘dearbhuithe rannpháirtíochta’ iad atá na gealltanais. Tá gníomhaíochtaí nithiúla (beartaithe nó ar siúl) sna gealltanais sin chun ceanglais shonracha an Ghnímh um an Intleacht Shaorga a chomhlíonadh agus áirítear leo amlíne chun iad a ghlacadh. Is féidir le dearbhuithe rannpháirtíochta den sórt sin a bheith i bhfoirm cuspóirí incriminteacha freisin. Chun cloí leis na gealltanais dheonacha, déan teagmháil le EU-AI-PACT@ec.europa.eu.

Eagraíonn an Oifig um Intleacht Shaorga imeachtaí go rialta faoin dá Cholún . Chun fanacht cothrom le dáta agus clárú, tabhair cuairt arleathanach gréasáin Imeachtaí an Chomhshocraithe um an Intleacht Shaorga.

An bhfuil suim agat a bheith i do pháirtí leasmhar gníomhach sa Chomhshocrú maidir leis an Intleacht Shaorga? Glac páirt sa tionscnamh! Tá sé oscailte do gach páirtí leasmhar.

Tá treoirlínte nó próisis inmheánacha curtha ar fáil ag d’eagraíocht cheana féin chun dearadh, forbairt agus úsáid córas intleachta saorga iontaofa a chinntiú? Déan iad a roinnt agus a thástáil le pobal an Chomhshocraithe um an Intleacht Shaorga!

Síniú na ngealltanas

An 25 Meán Fómhair 2024, thionóil an Coimisiún príomhpháirtithe leasmhara tionscail sa Bhruiséil chun céad sínithe na ngealltanas a cheiliúradh. Go dtí seo, shínigh thart ar 200 cuideachta na gealltanais, lena n-áirítear corparáidí móra, Fiontair Bheaga agus Mheánmhéide (FBManna) ón Aontas agus níos faide i gcéin. Déanann na cuideachtaí sin ionadaíocht ar earnálacha éagsúla, lena n-áirítear TF, teileachumarsáid, cúram sláinte, baincéireacht, mótarfheithiclí agus aerloingseoireacht. Tá an liosta iomlán le feiceáil thíos.

Le gealltanais dheonacha Chomhshocrú IS an Aontais, iarrtar ar chuideachtaí rannpháirteacha gealltanas a thabhairt maidir le trí phríomhghníomhaíocht ar a laghad:

• Straitéis rialachais intleachta saorga a ghlacadh chun glacadh na hintleachta saorga a chothú san eagraíocht agus oibriú i dtreo chomhlíonadh an Ghnímh um an Intleacht Shaorga amach anseo
• Córais intleachta saorga ar dócha go ndéanfar iad a aicmiú mar chórais ardriosca faoin nGníomh um an Intleacht Shaorga a shainaithint agus a mhapáil
• Feasacht agus litearthacht IS a chur chun cinn i measc na foirne, forbairt eiticiúil fhreagrach IS a áirithiú

Tá gealltanais bhreise maidir leis an gComhshocrú um an Intleacht Shaorga geallta ag breis agus leath de na cuideachtaí sin, amhail formhaoirseacht dhaonna, maolú riosca, agus trédhearcacht in ábhar a ghintear leis an intleacht shaorga amhail domhainbhrionnuithe. Tá siad sin nasctha le hoibleagáidí a tugadh isteach leis an nGníomh um an Intleacht Shaorga maidir le trédhearcacht agus ceanglais le haghaidh córais intleachta saorga ardriosca.

Rinneadh téacs na ngealltanas (.pdf), a dhréachtaigh an Oifig um Intleacht Shaorga ar dtús, a roinnt leis na páirtithe leasmhara ábhartha i líonra an Chomhshocraithe um an Intleacht Shaorga chun aiseolas agus léargais a bhailiú. Mar thoradh air sin, léiríonn an leagan deiridh de na gealltanais an t-ionchur a fuarthas ó pháirtithe leasmhara. Níl na gealltanais sin ceangailteach ó thaobh dlí de agus ní fhorchuireann siad aon oibleagáidí dlíthiúla ar rannpháirtithe. Beidh cuideachtaí in ann iad a shíniú tráth ar bith go dtí go mbeidh feidhm iomlán ag an nGníomh um an Intleacht Shaorga.

Tabharfar cuireadh do chuideachtaí rannpháirteacha tuairisc phoiblí a thabhairt ar a ndul chun cinn 12 mhí tar éis fhoilsiú a ngealltanas. Is é príomhchuspóir na tuarascála léargas agus trédhearcacht a thabhairt ar an dul chun cinn atá déanta maidir leis na gealltanais sin a chomhlíonadh.

Cad iad na buntáistí a bhaineann leis na gealltanais dheonacha do rannpháirtithe?

Tá an Coimisiún ag obair i gcomhar leis na rannpháirtithe agus ag tacú leo chun an méid seo a leanas a dhéanamh:

• comhthuiscint a fhorbairt ar chuspóirí an Ghnímh um an Intleacht Shaorga

• gníomhaíochtaí nithiúla a dhéanamh chun cur chun feidhme an Ghnímh um an Intleacht Shaorga amach anseo a thuiscint, a oiriúnú agus ullmhú dó (e.g. próisis inmheánacha a thógáil, foireann a ullmhú agus córais intleachta saorga a fhéinmheasúnú)

• eolas a chomhroinnt agus infheictheacht agus inchreidteacht na gcoimircí a cuireadh i bhfeidhm a mhéadú chun IS iontaofa a léiriú

• muinín bhreise a chothú i dteicneolaíochtaí IS

Leis an gComhshocrú, tá deis á tabhairt do cheannródaithe agus do rannpháirtithe uaillmhianacha a réitigh a thástáil agus a chomhroinnt leis an bpobal i gcoitinne, agus forbairt agus imscaradh IS iontaofa á gcothú ag an am céanna.