Scileanna digiteacha agus poist dhigiteacha

Scileanna digiteacha agus poist dhigiteacha

Teastaíonn scileanna digiteacha ó gach Eorpach chun staidéar a dhéanamh, obair a dhéanamh, cumarsáid a dhéanamh, rochtain a fháil ar sheirbhísí poiblí ar líne agus faisnéis iontaofa a fháil. Mar sin féin, tá go leor Eorpach ann nach bhfuil scileanna digiteacha leordhóthanacha acu. Léiríonn an tInnéacs um an nGeilleagar Digiteach agus an tSochaí Dhigiteach (DESI) nach bhfuil bunscileanna digiteacha ag ceathrar as gach deichniúr daoine fásta ná ag gach tríú duine a oibríonn san Eoraip. Tá ionadaíocht íseal ann freisin ar mhná i ngairmeacha agus staidéir a bhaineann leis an teicneolaíocht, agus ní mná iad ach duine as gach seisear speisialtóirí TFC agus duine as gach triúr céimithe eolaíochta, teicneolaíochta, innealtóireachta agus matamaitice (ETIM).

Tá spriocanna leagtha síos ag an gCoimisiún Eorpach sa chlár oibre Eorpach um scileanna agus sa phlean gníomhaíochta don oideachas digiteach chun a chinntiú go mbeidh bunscileanna digiteacha ag 70 % de dhaoine fásta faoi 2025. Is é is aidhm do na tionscnaimh sin leibhéal na ndaoine idir 13-14 bliana d’aois nach n-éiríonn go maith leo sa ríomhaireacht agus sa litearthacht dhigiteach a laghdú ó 30 % (2019) go 15 % in 2030.

Is tionscnamh nua é an tArdán Eorpach um Scileanna Digiteacha agus Poist Dhigiteacha a seoladh faoi Chlár na Saoráide um Chónascadh na hEorpa . Cuireann sé faisnéis agus acmhainní ar fáil maidir le scileanna digiteacha, chomh maith le deiseanna oiliúna agus cistiúcháin.

Cúlra

Dúirt os cionn 70 % de ghnólachtaí gur bac ar infheistíocht é an easpa foirne a bhfuil scileanna digiteacha leordhóthanacha acu. Tá ganntanas saineolaithe digiteacha os comhair na hEorpa freisin ar féidir leo teicneolaíochtaí ceannródaíocha a fhorbairt ar mhaithe leis na saoránaigh uile.

Tá geilleagar digiteach láidir atá á chumhachtú ag Eorpaigh a bhfuil scileanna digiteacha acu ríthábhachtach don nuálaíocht, don fhás, do phoist agus d’iomaíochas na hEorpa. Tá tionchar ollmhór ag leathadh na dteicneolaíochtaí digiteacha ar an margadh saothair agus ar na cineálacha scileanna is gá sa gheilleagar agus sa tsochaí. Ní mór do na Ballstáit, do ghnólachtaí, do sholáthraithe oiliúna, don Choimisiún Eorpach agus d’eagraíochtaí eile oibriú le chéile chun dul i ngleic leis an mbearna scileanna digiteacha.

Chun forbairt an aistrithe dhigitigh agus na bearna scileanna digiteacha a leanúint, foilsíonn an Coimisiún DESI gach bliain. Rianaítear leis feidhmíocht dhigiteach na mBallstát i réimsí éagsúla chun faireachán a dhéanamh ar an dul chun cinn agus chun na háiteanna a bhfuil gá le tuilleadh iarrachtaí a shainaithint.