Ríomhsheirbhísí rialtais agus seirbhísí poiblí digiteacha

Is féidir le seirbhísí poiblí digiteacha éifeachtacha, nó ríomhsheirbhísí rialtais, réimse leathan buntáistí a chur ar fáil. Áirítear orthu sin níos mó éifeachtúlachta agus coigiltis do rialtais agus do ghnólachtaí, trédhearcacht mhéadaithe, agus rannpháirtíocht níos mó na saoránach sa saol polaitiúil.

Tá TFC in úsáid go forleathan cheana féin ag comhlachtaí rialtais, ach tá níos mó i gceist le ríomhsheirbhísí rialtais ná na huirlisí amháin: is éard atá i gceist leis athmhachnamh a dhéanamh ar eagraíochtaí agus ar phróisis, agus iompraíocht a athrú ionas go soláthrófar seirbhísí poiblí ar bhealach níos éifeachtúla do dhaoine. Agus é curtha chun feidhme go maith, cuireann r-Rialtas ar chumas saoránach, fiontar agus eagraíochtaí a n-idirghníomhaíochtaí leis an rialtas a dhéanamh ar bhealach níos éasca, níos tapúla agus ar chostas níos ísle.

Tá an coigilteas costais a d’fhéadfadh a bheith ann ollmhór. Sa Danmhairg, sábhálann ríomhshonrascadh €150 milliún in aghaidh na bliana ar cháiníocóirí agus ar ghnólachtaí €50 milliún in aghaidh na bliana. Dá dtabharfaí isteach é ar fud an Aontais, d’fhéadfadh coigilteas bliantúil a bheith níos mó ná €50 billiún. Idir an dá linn, san Iodáil, laghdaigh córais ríomhsholáthair breis agus €3 bhilliún i gcostais.

Cuireann seirbhísí poiblí digiteacha trasteorann ar chumas daoine gluaiseacht faoi shaoirse san Aontas. Cibé an bhfuil tú ag bogadh chun oibre nó chun teaghlaigh, is féidir leat déileáil go héasca le seirbhísí poiblí lasmuigh de do thír dhúchais.

Mar chuid dá straitéis, tá bearta nithiúla á ndéanamh ag an gCoimisiún Eorpach chun seirbhísí poiblí digiteacha trasteorann a fhorbairt. Áirítear orthu sin, ach gan a bheith teoranta dóibh, ardáin idir-inoibritheacha Eorpacha a chruthú amhail creat coiteann do bhainistiú céannachta leictreonaí na saoránach, agus nuálaíocht a chothú trí thionscadail phíolótacha ar mhórscála a chistiú.

Tá treoirlínte ar fáil maidir le conas úsáid níos fearr a bhaint as caighdeáin oscailte do chórais TFC na n-údarás poiblí chun spleáchais ar sholáthraithe áirithe córas TFC a sheachaint (glasáil isteach).