r-Shláinte - seirbhísí digiteacha i réimse na sláinte agus an chúraim

D’fhoilsigh an Coimisiún Eorpach Teachtaireacht maidir le claochlú digiteach na sláinte agus an chúraim. Is é is aidhm don Teachtaireacht saoránaigh a chumhachtú agus sochaí níos sláintiúla a thógáil. 

Trí thosaíocht

Sainaithnítear 3 thosaíocht sa Teachtaireacht maidir le claochlú digiteach na sláinte agus an chúraim sláinte:

1. rochtain shlán na saoránach ar a gcuid sonraí sláinte, lena n-áirítear thar theorainneacha, rud a chuireann ar chumas na saoránach rochtain a fháil ar a gcuid sonraí sláinte ar fud an Aontais;
2. leigheas pearsantaithe trí bhonneagar comhroinnte sonraí Eorpach, rud a chuireann ar chumas taighdeoirí agus gairmithe eile acmhainní (sonraí, saineolas, próiseáil ríomhaireachta agus acmhainneachtaí stórála) a chomhthiomsú ar fud an Aontais;
3. cumhachtú na saoránach le huirlisí digiteacha le haghaidh aiseolas úsáideoirí agus cúram duinelárnach trí úsáid a bhaint as uirlisí digiteacha chun daoine a chumhachtú chun aire a thabhairt dá sláinte, cosc a spreagadh agus aiseolas agus idirghníomhaíocht idir úsáideoirí agus soláthraithe cúraim sláinte a chumasú.

Ina theannta sin, cuirtear tacar nithiúil gníomhaíochtaí ar fáil sa Teachtaireacht maidir leis an gcaoi ar féidir gach tosaíocht a bhaint amach.

Tá tábhacht le do thuairim 

Reáchtáladh comhairliúchán poiblí in 2017 maidir le claochlú na sláinte agus an chúraim sláinte. Bhailigh sé ionchur maidir le raon feidhme na ngníomhaíochtaí beartais atá le saothrú chun sláinte agus cúram daoine a fheabhsú. Fuair an comhairliúchán seo beagnach 1,500 freagra agus d'aontaigh os cionn 90% de na freagróirí gur cheart go mbeadh saoránaigh in ann a gcuid sonraí féin a bhainistiú. D’aontaigh níos mó ná 80 % de na freagróirí gur féidir le comhroinnt sonraí sláinte a bheith tairbheach agus dúirt thart ar 60 % de na freagróirí nach bhfuil rochtain acu ar sheirbhísí sláinte digiteacha. Tá achoimre mhionsonraithe ar thorthaí an chomhairliúcháin ar fáil.

Cén fáth digiteach?

Rachaidh claochlú na sláinte agus an chúraim le haghaidh Eoraip dhigiteach chun tairbhe do dhaoine, do chórais cúraim sláinte agus don gheilleagar. Le teicneolaíochtaí digiteacha amhail cumarsáid mhóibíleach 5G, an intleacht shaorga agus an tsár-ríomhaireacht, cuirtear deiseanna nua ar fáil chun an bealach a bhfaighimid agus a gcuirimid seirbhísí sláinte agus cúraim ar fáil a athrú ó bhonn. Cumasaíonn siad cineálacha cur chuige nuálacha maidir le maireachtáil neamhspleách agus cúram sláinte agus sóisialta comhtháite.

Is féidir le sonraí sláinte agus ardanailísíocht sonraí cuidiú le dlús a chur le taighde eolaíoch, leigheas a phearsantú, agus diagnóisiú luath galar agus tuilleadh a sholáthar.

Plean gníomhaíochta an Aontais chun an chibearshlándáil a neartú in earnáil na sláinte

An 15 Eanáir 2024, sheol an Coimisiún plean gníomhaíochta Eorpach chun cibearshlándáil ospidéal agus soláthraithe cúraim sláinte a neartú. Mar chuid de Threoirlínte Polaitiúla shainordú 2024-2029 ón gCoimisiún, dírítear sa phlean gníomhaíochta ar bhrath bagairtí, ullmhacht agus freagairt ar ghéarchéimeanna in earnáil an chúraim sláinte a fheabhsú. Is é is aidhm dó treoir shaincheaptha, uirlisí, seirbhísí agus oiliúint a chur ar fáil d’ospidéil agus do sholáthraithe cúraim sláinte. Déanfar roinnt gníomhaíochtaí sonracha a chur i bhfeidhm de réir a chéile in 2025 agus 2026, i gcomhar le soláthraithe sláinte, le tíortha an Aontais, agus leis an bpobal cibearshlándála. Is é an tionscnamh seo an chéad tionscnamh earnáilsonrach chun raon iomlán bhearta cibearshlándála an Aontais a chur in úsáid.