Il-laqgħa kienet kopreseduta mill-Viċi President Eżekuttiv tal-Kummissjoni Ewropea għas-Sovranità, is-Sigurtà u d-Demokrazija tat-Teknoloġija Henna Virkkunen, il-Ministru Ġappuniż għat-Trasformazzjoni Diġitali Taira Masaaki, il-Ministru tal-Istat Ġappuniż għall-Affarijiet Interni u l-Komunikazzjoni Adachi Masashi, u l-Viċi Ministru Parlamentari Ġappuniż għall-Ekonomija, il-Kummerċ u l-Industrija Takeuchi Shinji.
L-UE u l-Ġappun evalwaw il-progress mit-tieni laqgħa tal-Kunsill ta’ Sħubija Diġitali bejn l-Unjoni Ewropea u l-Ġappun u ħabbru riżultati tanġibbli ġodda, biex jikkooperaw aktar f’oqsma bħall-intelliġenza artifiċjali (IA), il-5G/6G, is-semikondutturi, il-computing ta’ prestazzjoni għolja u t-teknoloġija kwantistika. Se jsaħħu wkoll il-kollaborazzjoni tagħhom dwar il-governanza tad-data u l-pjattaformi online, il-kejbils sottomarini, il-konnettività tal-Artiku, l-identitajiet diġitali, is-servizzi fiduċjarji, u ċ-ċibersigurtà. Iż-żewġ naħat affermaw mill-ġdid ir-rilevanza dejjem akbar tas-Sħubija Diġitali u l-kollaborazzjoni konġunta li tistimula fil-kuntest tal-isfidi ġeopolitiċi.