Skont l-Att dwar l-IA, kontenut bħal deepfakes u ċertu test iġġenerat mill-IA u materjal sintetiku ieħor irid jiġi mmarkat b’mod ċar bħala tali. Dan ir-rekwiżit jirrifletti d-diffikultà dejjem tikber fid-distinzjoni tal-kontenut iġġenerat mill-IA minn materjal awtentiku u prodott mill-bniedem.
L-Att dwar l-IA jistabbilixxi rekwiżiti ta’ trasparenza għall-fornituri u għall-implimentaturi ta’ ċerti sistemi tal-IA, inkluża l-IA ġenerattiva u interattiva. Dawn ir-regoli għandhom l-għan li jnaqqsu r-riskju ta’ miżinformazzjoni, frodi, impersonazzjoni, u qerq tal-konsumatur billi jrawmu l-fiduċja fl-ekosistema tal-informazzjoni.
Il-laqgħa plenarja ta’ tnedija, li laqqgħet flimkien l-esperti indipendenti maħtura mill-Uffiċċju Ewropew tal-IA, timmarka l-bidu ta’ proċess inklużiv, ta’ seba’ xhur, immexxi mill-partijiet ikkonċernati biex jiġi abbozzat il-kodiċi. L-esperti indipendenti se jmexxu l-proċess, billi jużaw il-kontribut mill-konsultazzjoni pubblika u l-partijiet ikkonċernati magħżula permezz ta’ sejħa miftuħa.
Il-kodiċi ta’ prattika li jmiss dwar it-trasparenza tal-kontenut iġġenerat mill-IA se jkun strument volontarju biex jgħin lill-fornituri tas-sistemi ġenerattivi tal-IA jissodisfaw b’mod effettiv l-obbligi ta’ trasparenza tagħhom. Dan se jappoġġa l-immarkar tal-kontenut iġġenerat mill-IA, inkluż l-awdjo sintetiku, l-immaġnijiet, il-vidjo u t-test, f’formati li jinqraw mill-magni biex tkun tista’ ssir id-detezzjoni. Il-Kodiċi se jgħin ukoll lill-implimentaturi li jużaw deepfakes jew kontenut iġġenerat mill-IA biex jiżvelaw b’mod ċar l-involviment tal-IA, b’mod partikolari meta jinfurmaw lill-pubbliku dwar kwistjonijiet ta’ interess pubbliku.
Dawn l-obbligi se jsiru applikabbli f’Awwissu 2026, u jikkomplementaw ir-regoli eżistenti bħal sistemi tal-IA b’riskju għoli jew mudelli tal-IA bi skop ġenerali.
Aqra aktar informazzjoni dwar:
Last update
12 Diċembru 2025