AdobeStock © KhunkornStudio
Dan il-mudell huwa mod sempliċi, uniformi u effettiv għall-fornituri tal-GPAI biex iżidu t-trasparenza f’konformità mal-Att dwar l-IA, inkluż li tali sommarju jsir disponibbli għall-pubbliku.
Henna Virkkunen, il-Viċi President Eżekuttiv għas-Sovranità Teknoloġika, is-Sigurtà u d-Demokrazija, qalet: “Il-mudell tal-lum adottat mill-Kummissjoni huwa pass importanti ieħor lejn IA affidabbli u trasparenti. Billi nipprovdu dokument faċli biex jintuża, qed nappoġġaw lill-fornituri ta’ mudelli tal-IA bi skop ġenerali biex jikkonformaw mal-Att dwar l-IA. Dan huwa kif nistgħu nibnu l-fiduċja fl-IA u nisfruttaw il-potenzjal sħiħ tagħha għall-benefiċċju tal-ekonomija u tas-soċjetà.”
Il-mudelli tal-IA bi skop ġenerali huma mħarrġa bi kwantitajiet kbar ta’ data iżda hemm biss informazzjoni limitata disponibbli dwar l-oriġini ta’ din id-data. Is-sommarju pubbliku se jipprovdi ħarsa ġenerali komprensiva tad-data użata biex jitħarreġ mudell, jiġu elenkati l-ġabriet ewlenin tad-data u jiġu spjegati sorsi oħra użati. Dan il-mudell se jassisti wkoll lill-partijiet b’interessi leġittimi, bħad-detenturi tad-drittijiet tal-awtur, fl-eżerċizzju tad-drittijiet tagħhom skont il-liġi tal-Unjoni.
Il-mudell huwa parti minn inizjattiva usa’ marbuta mar-regoli għall-UE kollha għall-mudelli tal-IA bi skop ġenerali li bdew fit-2 ta’ Awwissu 2025. Dan jikkomplementa l-linji gwida dwar il-kamp ta’ applikazzjoni tar-regoli għall-mudelli tal-IA bi skop ġenerali, ippubblikati fit-18 ta’ Lulju, u l-Kodiċi ta’ Prattika tal-IA bi Skop Ġenerali maħruġ fl-10 ta’ Lulju.
Aktar informazzjoni hija disponibbli fil-mistoqsijiet u t-tweġibiet online.
Iddawnlowdja l-Mudell għall-fornituri tal-mudelli tal-IA bi skop ġenerali biex tiġbor fil-qosor il-kontenut tat-taħriġ tagħhom.