GettyImages 1415445439 © Dragon Claws
Il-kejbils sottomarini huma kruċjali għall-konnettività internazzjonali, it-traffiku tad-data u l-komunikazzjonijiet. Id-Dikjarazzjoni Konġunta, proposta mill-Istati Uniti, tistabbilixxi prinċipji biex jiġi żgurat li l-infrastruttura tal-kejbil taħt il-baħar tkun sigura, affidabbli, sostenibbli u reżiljenti. Dawn il-prinċipji jinkludu rakkomandazzjonijiet biex jintgħażlu fornituri tal-kejbil taħt il-baħar b’riskju baxx, jiġu segwiti l-aħjar prattiki taċ-ċibersigurtà, tissaħħaħ id-diversità tar-rotot u jiġu protetti n-networks tal-kejbil minn aċċess mhux awtorizzat għad-data fi tranżitu.
Margrethe Vestager, il-Viċi President Eżekuttiv għal Ewropa Lesta għall-Era Diġitali, qalet:
“Il-kejbils sottomarini huma infrastruttura strateġika ħafna. Kważi t-traffiku internazzjonali kollu tad-data jinġarr permezz ta’ kejbils taħt il-baħar, li jesponihom għal theddid għas-sigurtà mill-hacking għas-sorveljanza. Nilqa’ bil-qalb id-dikjarazzjoni konġunta li se tippermetti lilna u lis-sħab tagħna nsaħħu s-sigurtà tal-kejbils taħt il-baħar globalment.”
Id-Dikjarazzjoni Konġunta hija konformi mar-rakkomandazzjoni tal-Kummissjoni dwar is-sigurtà u r-reżiljenza tal-infrastrutturi tal-kejbils sottomarini, li tippreżenta sett ta’ azzjonijiet fil-livell nazzjonali u tal-UE mmirati lejn it-titjib tas-sigurtà u r-reżiljenza tal-kejbils sottomarini, permezz ta’ koordinazzjoni aħjar madwar l-UE, kemm f’termini ta’ governanza kif ukoll ta’ finanzjament.