In-negozjati bi trilogu issa ġew konklużi. Dan iwitti t-triq għall-approvazzjoni finali tat-test legali mill-Parlament Ewropew u mill-Kunsill.
Il-Viċi President Eżekuttiv għal Ewropa Lesta għall-Era Diġitali, Margrethe Vestager, qalet:
Dan ir-Regolament huwa l-ewwel element kostitwenti għall-istabbiliment ta’ ekonomija solida u ġusta mmexxija mid-data. Ir-Regolament huwa dwar l-istabbiliment tal-kundizzjonijiet it-tajbin għall-iskambju bil-fiduċja ta’ data, bi qbil mal-valuri u mad-drittijiet fundamentali Ewropej tagħna. Qed noħolqu ambjent sikur li fih id-data tista’ tiġi kondiviża bejn is-setturi u l-Istati Membri għall-benefiċċju tas-soċjetà u tal-ekonomija.
Il-Kummissarju għas-Suq Intern, Thierry Breton, qal:
Bl-Att dwar il-Governanza tad-Data maqbul illum, qed niddefinixxu approċċ komuni għall-kondiviżjoni tad-data — il-mod Ewropew. Qegħdin niffaċilitaw il-fluss ta’ data industrijali dejjem tiżdied minn settur għal ieħor u minn Stat Membru għal ieħor. Dan se jgħin lill-Ewropa ssir il-kontinent ewlieni għad-data. Dan qed nagħmluh billi nibnu l-fiduċja u nħallu r-riedni f’idejn il-kumpaniji u l-individwi li jiġġeneraw id-data biex jibqgħu jikkontrollawha huma. Fil-qosor: suq Uniku Ewropew miftuħ iżda sovran għad-data.