Minn meta bdiet is-sistema taċ-Ċertifikat COVID Diġitali tal-UE f’Lulju 2021, inħarġu aktar minn 1.7 biljun ċertifikat. Minħabba r-rwol ta’ suċċess tagħha fl-għajnuna biex jitneħħew ir-restrizzjonijiet fuq l-ivvjaġġar, iċ-ċertifikati tal-UE xi drabi saru mira għall-frodaturi iżda l-għadd globali ta’ ċertifikati maħruġa b’mod frodulenti jew bi żball għadu baxx ħafna. Meta jinstabu frodi jew żbalji, huwa importanti li ċ-ċertifikati kkonċernati jkunu jistgħu jiġu revokati. Filwaqt li diversi Stati Membri diġà implimentaw sistemi ta’ revoka fil-livell nazzjonali, is-sistema l-ġdida fil-livell tal-UE se tippermetti r-revoka sigura u effiċjenti transfruntiera permezz tal-Gateway tal-UE. Dan it-titjib għandu jkompli jsaħħaħ il-fiduċja u l-kunfidenza fis-sistema taċ-Ċertifikat COVID Diġitali tal-UE.