iStock GettyImages © Andrey Suslov
Bħala punt ta’ konnessjoni mal-ekosistema emerġenti tal-EOSC, in-Nodu tal-UE tal-EOSC huwa kemm pjattaforma kif ukoll portal ta’ informazzjoni li jgħin biex jgħaqqad flimkien l-infrastruttura tar-riċerka diġitali madwar l-Ewropa.
L-ambizzjoni tal-EOSC hija li joħloq “Webta’ Data u Servizzi FAIR”għax-xjenza fl-Ewropa. Bħala ambjent miftuħ għar-riċerka, dan se jgħaqqad is-servizzi xjentifiċi eżistenti, jappoġġa l-politika tal-UE dwar ix-xjenza miftuħa, filwaqt li jiftaħ opportunitajiet ġodda għar-riċerkaturi.
F’livell prattiku, in-Nodu tal-UE tal-EOSC jippermetti lill-utenti jaċċessaw data u software fuq il-cloud, jikkondividu għodod u fajls, jużaw kotba tax-xogħol kollaborattivi u magni virtwali, kollha b’metodi sempliċi ta’ awtentikazzjoni. Huwa “żerriegħa fil-prattika” għall-iżvilupp tal-EOSC, li jistabbilixxi pjan ta’ azzjoni għan-Nodi futuri tal-EOSC.
Il-Viċi President Eżekuttiv għal Ewropa Lesta għall-Era Diġitali, Margrethe Vestager, qalet:
“Il-Cloud Ewropew tax-Xjenza Miftuħa l-ġdid se jgħin lir-riċerkaturi u lill-kumpaniji jibnu fuq ir-riċerka li diġà saret fl-Ewropa u jsarrfuha f’soluzzjonijiet konkreti li jgħinu liċ-ċittadini u lill-kumpaniji Ewropej.”
L-EOSC huwa parti ewlenija mill-ambizzjoni tal-Kummissjoni li tippermetti l-fluss liberu tad-data u toħloq suq uniku diġitali. Dan se jgħin biex tinkiseb l-Istrateġija Ewropea għad-Data u tingħata spinta lill-pożizzjoni tal-Ewropa bħala soċjetà mmexxija mid-data. In-Nodu tal-UE tal-EOSC ġie ffinanzjat b’€30 miljun minn Orizzont Ewropa, li investa €257 miljun fl-EOSC mill-2021.
Sib aktar informazzjoni: