L-UE ssaħħaħ iċ-ċibersigurtà tagħha bi kriptografija postkwantistika

Imfassal b’algoritmi kumplessi, dan huwa pass importanti biex jiddevja t-theddid ċibernetiku avvanzat.  

Henna Virkkunen, il-Viċi President Eżekuttiv għas-Sovranità Teknoloġika, is-Sigurtà u d-Demokrazija, qalet:

“Hekk kif nidħlu fl-era kwantistika, il-kriptografija postkwantistika hija essenzjali biex jiġi żgurat livell għoli ta’ ċibersigurtà, li ssaħħaħ is-sistemi tagħna kontra theddid futur. Il-pjan direzzjonali dwar il-kriptografija postkwantistika jipprovdi direzzjoni ċara biex tiġi żgurata s-sigurtà robusta tal-infrastruttura diġitali tagħna.”  

It-teknoloġiji kwantistiċi jistgħu jwettqu kompiti kumplessi u jwasslu għal soluzzjonijiet għall-isfidi globali tal-lum, inkluż it-tibdil fil-klima, l-identifikazzjoni ta’ diżastri naturali, u s-sejbien ta’ soluzzjonijiet ġodda fil-kura tas-saħħa. Il-potenzjal tat-teknoloġija kwantistika li twassal benefiċċji għas-soċjetà huwa akkumpanjat minn riskji li l-użu ħażin tagħha jista’ joħloq għaċ-ċibersigurtà tal-komunikazzjonijiet u l-infrastruttura konnessa tagħna. Soluzzjoni effettiva għal dawn l-isfidi hija l-kriptografija postkwantistika, li tuża metodi ta’ kriptaġġ ibbażati fuq problemi matematiċi kumplessi li anke l-kompjuters kwantistiċi jsibuha diffiċli biex isolvu.  

L-Istati Membri kollha għandhom jibdew it-tranżizzjoni lejn kriptografija postkwantistika sa tmiem l-2026. Fl-istess ħin, il-protezzjoni tal-infrastrutturi kritiċi jenħtieġ li tiġi ttrasferita lejn il-PQC mill-aktar fis possibbli, mhux aktar tard minn tmiem l-2030.  

Bi tweġiba għar-Rakkomandazzjoni tal-Kummissjoni ppubblikata fil-11 ta’ April 2024, il-Grupp ta’ Kooperazzjoni tal-NIS żviluppa l-istrateġija, li tirrifletti l-ħtieġa li l-Ewropa taġixxi issa, hekk kif l-iżvilupp tal-kompjuters kwantistiċi javvanza malajr.

Aqra aktar informazzjoni dwar il-pjan direzzjonali dwar il-kriptografija postkwantistika.