Il-Viċi President Eżekuttiv għas-Sovranità Teknoloġika, is-Sigurtà u d-Demokrazija, Henna Virkkunen qalet:
“Id-djalogu tal-lum jirrappreżenta l-ewwel pass fis-simplifikazzjoni tar-regoli diġitali tagħna għaċ-ċittadini u n-negozji kollha. Nistenna bil-ħerqa li nisma’ l-fehmiet tal-konsumaturi u tan-negozji tal-UE u li nirrifletti flimkien dwar kif nistgħu noħolqu approċċ saħansitra aktar koeżiv u sempliċi għall-politika dwar id-data.”
Il-Kummissjoni stiednet lill-partijiet ikkonċernati biex jipparteċipaw f’dan id-djalogu, inklużi l-korpi tas-settur pubbliku, il-kumpaniji li jużaw l-informazzjoni tas-settur pubbliku, il-fornituri tas-servizzi ta’ intermedjazzjoni tad-data, ir-rappreżentanti tal-intrapriżi żgħar u ta’ daqs medju, l-assoċjazzjonijiet Ewropej tal-konsumaturi, u l-kumpaniji li jimmanifatturaw prodotti konnessi.
Dan id-djalogu se jgħin fit-tħejjija tal-ħidma fuq l-Omnibus dwar is-Simplifikazzjoni Diġitali, li għandu jiġi ppreżentat aktar tard din is-sena. Se jikkontribwixxi wkoll għall-Istrateġija tal-UE dwar l-Unjoni tad-Data, li għandha l-għan li ssaħħaħ l-ekosistema tad-data tal-Ewropa.
Aqra aktar informazzjoni dwar id-djalogi ta’ implimentazzjoni.