iStock photo Getty images plus
L-għan tal-Laptops għall-Ukrajna huwa li jiġbru u jwasslu laptops, smart-phones u tablets u jwieġbu għall-ħtiġijiet fundamentali tal-iskejjel, tal-isptarijiet u tal-amministrazzjonijiet pubbliċi fir-reġjuni tal-gwerra l-aktar affettwati tal-Ukrajna.
L-awtoritajiet Ukreni identifikaw il-laptops bħala waħda mill-aktar ħtiġijiet urġenti bħalissa. Madwar 70,000 għalliem jeħtieġu laptops biex ikomplu jgħallmu, u 5,000 skola fir-reġjuni milquta mill-gwerra jeħtieġu apparat diġitali biex jiżguraw li 200,000 tifel u tifla tal-iskola jkunu jistgħu jkomplu jitgħallmu. Ħafna aktar apparati huma meħtieġa f’setturi oħra u, b’mod partikolari, għall-infermiera, it-tobba u l-amministrazzjoni pubblika.
Il-kumpaniji jistgħu jagħmlu donazzjonijiet akbar direttament permezz tal-mekkaniżmu tal-UE għall-protezzjoni ċivili. Għal donazzjonijiet iżgħar, l-organizzazzjonijiet, il-kumpaniji u ċ-ċittadini bbażati fil-Belġju jistgħu jagħtu apparat permezz ta’ DigitalEurope. Id-donazzjonijiet jistgħu jinkludu laptops, smartphones jew tablets ġodda jew użati u funzjonanti li jinsabu madwar id-djar jew fl-uffiċċji. L-organizzaturi qed ifittxu li jespandu l-inizjattiva biex tinkludi ċentri oħra ta’ ġbir madwar l-Ewropa.
Il-Kummissjoni qed taħdem mas-sħab tal-industrija biex tirċievi donazzjonijiet bħala parti mill-inizjattiva l-ġdida, kif ukoll biex tiġbor u twassal tagħmir teknoloġiku ieħor bħala parti mill-EUTech4Ukraine. Fl-istess ħin, il-Kummissjoni se tiffaċilita l-ġbir ta’ tagħmir fi ħdan l-istituzzjonijiet tal-UE.
Permezz tal-mekkaniżmu tal-UE għall-protezzjoni ċivili, l-apparati se jinġabru u jintbagħtu lejn l-Ukrajna, f’postijiet fejn it-tagħmir huwa l-aktar meħtieġ. B’dan il-mekkaniżmu, id-donazzjonijiet minn kumpaniji privati jistgħu jiġu indirizzati wkoll.