Il-proġett AgriDataSpace kellu l-għan li jwitti t-triq għal Spazju Komuni Ewropew tad-Data Agrikola (CEADS) li jiffaċilita l-kondiviżjoni, l-ipproċessar u l-analiżi tad-data b’mod sigur, affidabbli, trasparenti u responsabbli. L-użu għandu jwassal għal żieda fil-prestazzjoni tas-settur u jagħti spinta lill-innovazzjonijiet xprunati mid-data – kemm min-naħa privata kif ukoll minn dik pubblika. Is-CEADS, oriġinarjament imħabbra taħt l-Istrateġija Ewropea għad-Data, se jkunu assi għall-aċċellerazzjoni tat-tranżizzjonijiet diġitali u ekoloġiċi doppji fis-settur, għat-tnaqqis tal-piżijiet amministrattivi, u biex jipprovdu l-pedament għall-applikazzjoni ta’ għodod b’saħħithom u emerġenti ġodda tal-Intelliġenza Artifiċjali (IA).
Nota ta’ politika (.pdf) tiddeskrivi l-approċċ propost għall-ispazju tad-data, fir-rigward tal-mudelli ta’ governanza u ta’ negozju, u l-pjan ta’ azzjoni għal arkitettura ta’ referenza teknika. Minbarra li jiddiskuti l-kundizzjonijiet abilitanti tat-tfassil, id-dokument jirrifletti b’mod partikolari dwar kif il-partijiet ikkonċernati differenti jistgħu jikkontribwixxu għall-implimentazzjoni tal-ispazju tad-data: dawk li jfasslu l-politika fil-livelli tal-UE u nazzjonali, l-organizzazzjonijiet settorjali, inklużi l-organizzazzjonijiet u l-kooperattivi tal-bdiewa u tal-produtturi, l-industrija, speċjalment il-manifatturi tal-makkinarju agrikolu, u l-innovaturi, bħal negozji ġodda.
Il-proġett AgriDataSpace ġie ffinanzjat taħt il-Programm Ewropa Diġitali b’baġit ta’ EUR 2 miljun. Ħmistax-il sieħeb li għandhom l-għeruq tagħhom fl-ekosistema tal-ispazju tad-data tal-UE, li jirrappreżentaw 10 pajjiżi, kienu involuti: istituti ta’ riċerka ewlenin, intermedjarji tad-data agrikola, u assoċjazzjonijiet tal-industrija.
Fil-bidu tal-2025 se titnieda azzjoni ta’ varar ta’ segwitu għall-introduzzjoni tal-ispazju tad-data. Informazzjoni dedikata se tiġi ppubblikata fuq dan is-sit web.