L-għan tas-sejħa huwa li tiżdied il-varjetà ta’ aħbarijiet, kontenut informattiv (u, potenzjalment, programmazzjoni) b’perspettiva pan-Ewropea disponibbli għaċ-ċittadini. Il-kontenut għandu jkollu approċċ ta’ interess ġenerali, jiġifieri li jkopri l-ġrajjiet kurrenti u suġġetti rilevanti għall-ħajja ta’ kuljum taċ-ċittadini Ewropej. L-applikanti huma mħeġġa jiżviluppaw ċentri tal-aħbarijiet taħt standards editorjali sodi u sorveljanza fuq il-produzzjoni u l-kurazzjoni tal-kontenut.
L-applikanti se jkollhom juru kif il-proposta tagħhom se tikkontribwixxi għat-tisħiħ tal-ispazju tal-informazzjoni Ewropew (lil hinn mis-swieq purament nazzjonali) u biex jiżguraw li ċ-ċittadini jirċievu informazzjoni ta’ kwalità pluralistika minn sorsi multikulturali u multilingwi. Il-proposti għandhom ikunu akkumpanjati minn pjan ta’ sensibilizzazzjoni. Il-pjan jenħtieġ li jidentifika l-udjenzi fil-mira u l-multiplikaturi rilevanti għall-prodott finali.
Dan il-kontenut għandu jkun attraenti u innovattiv. L-applikanti se jkunu responsabbli b’mod konġunt għall-kontenut prodott taħt l-iskema permezz tas-sistemi editorjali konġunti tagħhom. Huma mistennija jibnu fuq mekkaniżmi ta’ distribuzzjoni eżistenti ta’ aħbarijiet, kontenut informattiv u/jew programmazzjoni fattwali, u jarrikkixxuhom b’kontenut ġdid, u/jew jikkunsidraw pjattaforma/i ġdida/ġodda jekk jitqies meħtieġ.
Il-Kummissjoni Ewropea tistenna li l-applikanti jiġbru organizzazzjonijiet differenti tal-midja tal-aħbarijiet minn tal-anqas ħames Stati Membri tal-UE.
Biex ikunu eliġibbli, l-applikanti jridu jkunu attivi fl-industrija tal-midja tal-aħbarijiet. Il-Ftehim ta’ għotja finali se jinkludi karta ta’ indipendenza biex jiġi żgurat li l-applikanti jkunu jistgħu joperaw mingħajr ebda interferenza politika
Ir-rata massima ta’ kofinanzjament hija ta’ 80 % tal-ispejjeż totali eliġibbli.
Is-sejħa għall-proposti, il-formoli tal-applikazzjoni u d-dokumenti rilevanti kollha u huma disponibbli hawn taħt.
Riżultati mistennija
Żieda fid-disponibbiltà, il-kopertura u l-konsum tal-aħbarijiet dwar l-affarijiet tal-Unjoni f’mill-inqas ħames lingwi tal-Unjoni. Il-produzzjoni, il-ġestjoni u ċ-ċirkolazzjoni ta’ kontenut tal-aħbarijiet prodott minn kumpaniji tal-midja tal-aħbarijiet professjonali fl-Unjoni, permezz ta’ ċentri komuni u sistemi ta’ konsenja. Fit-tul dan jista’ jwassal għal involviment akbar miċ-ċittadini fl-aħbarijiet u l-affarijiet Ewropej u jgħin biex jiżdiedu l-livelli ta’ fiduċja għal kontenut ta’ aħbarijiet ta’ kwalità online.
L-enfasi territorjali ta’ din l-azzjoni hija: L-Istati Membri tal-UE, il-pajjiżi kandidati u l-pajjiżi kandidati potenzjali[1].
It-tul ta’ żmien mistenni tal-proġetti huwa ta’ 24 xahar, li jibda f’Jannar 2022.
Il-mistoqsijiet għal din is-sejħa għandhom jintbagħtu lil cnect-multimedia-actions@ec.europa.eu mhux aktar tard mit-8 ta’ Settembru. Il-mistoqsijiet u t-tweġibiet kollha se jiġu ppubblikati, b’mod anonimu, fuq din il-paġna.
Aktar informazzjoni
Din l-attività titwettaq fi ħdan il-qafas ta’ Azzjonijiet Multimedjali, li għandu l-għan li jiffinanzja informazzjoni ġenerali, aħbarijiet u programmi, liċ-ċittadini dwar operazzjonijiet li jikkonċernaw l-Unjoni, bl-għan li tiżdied il-viżibbiltà tal-ħidma tal-istituzzjonijiet tal-Unjoni, id-deċiżjonijiet meħuda u l-istadji fil-bini tal-Ewropa, sabiex iċ-ċittadini jkunu jistgħu jagħmlu użu sħiħ mid-dritt tagħhom li jkunu infurmati u involuti fil-politiki Ewropej u jikkontribwixxu għal sfera pubblika Ewropea aħjar. Minbarra r-rapporti tal-aħbarijiet dwar l-attivitajiet tal-istituzzjonijiet ewlenin tal-UE, l-affarijiet tal-Unjoni jistgħu jinkludu:
- Affarijiet ekonomiċi, politiċi u kulturali tal-Istati Membri kollha, imqabbla u kkuntrastati fil-mod li bih jittrattaw l-istess kwistjonijiet;
- Deċiżjonijiet meħuda fil-livell nazzjonali u reġjonali li għandhom il-potenzjal li jsawru fehmiet dwar l-Unjoni jew jaffettwaw il-ħajja ta’ kuljum ta’ għadd sinifikanti ta’ ċittadini tal-Unjoni fi Stati Membri oħra;
III. Affarijiet ekonomiċi, politiċi u kulturali ta’ Stat Membru wieħed tal-Unjoni, li juru liċ-ċittadini ta’ pajjiżi oħra tal-Unjoni kif jiġu indirizzati kwistjonijiet ta’ tħassib komuni.
L-aħħar deċiżjoni ta’ Finanzjament (2021) dwar l-Azzjonijiet Multimedjali hija disponibbli fuq:
https://digital-strategy.ec.europa.eu/en/library/2021-financing-decision-multimedia-actions
[1] https://ec.europa.eu/neighbourhood-enlargement/countries/check-current-status_en