© image by littlehenrabi Getty/iStock
Intgħażlu seba’ proġetti wara l-ewwel sejħa għal proposti għal Sħubijiet tal-Ġurnaliżmu fl-2021, bħala parti mill-inizjattiva NEWS imħabbra fil-Pjan ta’ Azzjoni Medjatiku u Awdjoviżiv.
Is-7 proġett ta’ sħubija fil-ġurnaliżmu se jiġu ffinanzjati minn Ewropa Kreattiva. L-għan ġenerali tagħhom huwa li jindirizzaw l-isfidi strutturali li qed jiffaċċja s-settur tal-media tal-aħbarijiet, u jgħinu lill-media ssir aktar b’saħħitha fid-dawl tat-tranżizzjoni diġitali u ż-żieda fil-kompetizzjoni. Dawn ilaqqgħu flimkien diversi organizzazzjonijiet tal-media tal-aħbarijiet biex jistabbilixxu networks għas-settur kollu għall-professjonisti tal-media u jiffukaw fuq it-trasformazzjoni kollaborattiva tan-negozju u/jew proġetti ġurnalistiċi kollaborattivi. Ir-rebbieħa ntgħażlu minn esperti indipendenti li evalwaw 32 proposta minn madwar l-Ewropa.
Věra Jourová, il-Viċi President għall-Valuri u t-Trasparenza, qalet:
“Minn taħriġ dwar is-sikurezza għal għotjiet għall-media lokali, dawn il-proġetti għandhom l-għan li jappoġġaw lill-ġurnalisti b’enfasi fuq il-kooperazzjoni transfruntiera. Hija l-ewwel darba li l-UE tappoġġa sħubijiet ġurnalistiċi bħal dawn. U mhijiex l-aħħar darba. Irridu ninvestu mill-inqas EUR 75 miljun fi proġetti simili sal-2027. Qed inżidu l-azzjoni, kemm f’termini ta’ finanzjament kif ukoll ta’ leġiżlazzjoni, biex nappoġġaw il-libertà u l-pluraliżmu tal-media, minħabba li dan huwa dwar is-saħħa tad-demokraziji tagħna.”
Il-Kummissarju għas-Suq Intern, Thierry Breton, żied:
“Il-media tiffaċċja sfidi bla preċedent inkluż tnaqqis fid-dħul, tranżizzjoni diġitali aċċellerata, kif ukoll theddid għall-pluraliżmu u l-indipendenza tal-media. Bl-appoġġ tal-UE ta’ EUR 8 miljun imħabbar illum, qed inrawmu kollaborazzjoni fost il-ġurnalisti u l-mezzi tal-media biex ngħinuhom jinnovaw, jittestjaw formati ġodda, jibnu ħiliet ġodda u b’hekk insaħħu r-reżiljenza tagħhom.”