Dan id-Dokument ta’ Ħidma tal-Persunal jipprovdi wkoll informazzjoni addizzjonali dwar ir-raġunament wara l-miżuri proposti fit-3 pilastri li huma l-pedamenti tal-proposta u jispjega aktar l-implimentazzjoni tagħhom. Dan ma kienx ikun possibbli mingħajr ma tiġi pprovduta deskrizzjoni panoramika tal-karatteristiċi tal-katina tal-valur tas-semikondutturi, ix-xejriet u l-opportunitajiet ewlenin tas-suq u tat-teknoloġija, minħabba l-kumplessità tal-kuntest teknoloġiku u tal-ekosistema tas-semikondutturi.
Id-dokument ta’ Ħidma tal-Persunal għandu wkoll l-għan li jiċċara l-kriżi li għaddejja bħalissa u r-rwol ċentrali li kisbu s-semikondutturi fil-kuntest globali. Is-semikondutturi huma tabilħaqq fiċ-ċentru tal-interessi ġeopolitiċi. L-ekonomiji ewlenin huma ħerqana li jiżguraw il-provvista tagħhom fiċ-ċipep l-aktar avvanzati b’investimenti sinifikanti, peress li dan qed jikkundizzjona dejjem aktar il-kapaċità tagħhom li jaġixxu ekonomikament, industrijalment, militarment, bħala l-ixpruni tat-trasformazzjoni diġitali.