Dan il-proġett il-ġdid se jgħin biex jixħet dawl fuq dawn l-oqsma u jidentifika dawk l-aktar f’riskju madwar l-Ewropa. Għandu jiġi ffinalizzat immappjar komprensiv sa tmiem l-2023 bl-għan li tiżdied il-bażi tal-għarfien tal-organizzazzjonijiet u tal-partijiet ikkonċernati attivi fil-qasam. Barra minn hekk, il-proġett se joffri EUR 1.2 miljun f’għotjiet lill-midja lokali, reġjonali u komunitarja, sabiex jgħin lill-istabbilimenti jinnovaw u jsiru aktar reżiljenti.
Il-Viċi President għall-Valuri u t-Trasparenza, Věra Jourová, qalet:
Ħafna komunitajiet m’għadhomx moqdija b’informazzjoni indipendenti li tkopri suġġetti ta’ interess dirett għalihom, bħall-politika lokali, avvenimenti komunitarji jew servizzi pubbliċi. Dan il-proġett se jiġġenera data kruċjali dwar il-kwistjoni tad-deżerti tal-aħbarijiet u jidentifika soluzzjonijiet prattiċi u jappoġġa direttament lill-midja lokali b’għotjiet.
Thierry Breton, il-Kummissarju għas-Suq Intern, qal:
Biex ikollhom aċċess għal pluralità ta’ vuċijiet u sorsi affidabbli ta’ informazzjoni, l-Ewropej jeħtieġu midja lokali u reġjonali. Dan il-proġett se jtejjeb ir-reżiljenza tagħhom u jappoġġa mudelli ta’ negozju innovattivi għall-media lokali tagħna biex jibqgħu rilevanti fit-territorji tagħhom.
Il-midja lokali u reġjonali li tinsab f’deżerti tal-aħbarijiet identifikati se tkun tista’ tapplika għal għotjiet madwar Marzu u Lulju 2023. Dan il-proġett huwa parti minn approċċ usa’ tal-Kummissjoni biex tagħti spinta lill-midja Ewropea u tgħin biex tinżamm l-awtonomija kulturali u teknoloġika Ewropea, kif stabbilit fil-Pjan ta’ Azzjoni Medjatiku u Awdjoviżiv (MAAP) u d-Deċennju Diġitali.