L-inklużjoni diġitali

Ta’ kuljum, aħna nużaw id-dinja diġitali kuljum biex inwettqu firxa ta’ kompiti, xi ħaġa li kompliet tiżdied fil-pandemija tal-COVID-19. Nużaw l-Internet u t-teknoloġiji ġodda biex naħdmu minn djarna, biex nitgħallmu ħiliet ġodda, biex naraw it-televiżjoni u l-films, u biex insiru nafu l-aħħar aħbarijiet permezz ta’ għafsa ta’ buttuna.  

Tabilħaqq, it-tranżizzjoni għad-dinja diġitali ġabitilna għadd ta’ opportunitajiet ġodda u eċitanti. Madankollu, mhux kulħadd għandu aċċess ugwali għal dawn l-opportunitajiet. Għal xi wħud, id-dinja diġitali għadha mhix kompletament aċċessibbli. Oħrajn ma jaffordjawhiex. Imbagħad hemm min ma ġiex mgħallem il-ħiliet biex jipparteċipaw bis-sħiħ.  

L-UE qiegħda taħdem biex l-Internet isir aktar aċċessibbli. Introduċiet attivitajiet bħal:  

• ICT aċċessibbli: l-ICT isir aktar aċċessibbli għal kulħadd u jitrawwem l-iżvilupp ta’ teknoloġiji aċċessibbli; 
• teknoloġiji ta’ assistenza: jingħata appoġġ lill-iżvilupp ta’ ICT li jgħinu lin-nies b’diżabilitajiet fid-dinja diġitali; 
• ħiliet bażiċi u diġitali: iċ-ċittadini jingħataw is-setgħa biex jiġġieldu l-marġinalizzazzjoni u l-esklużjoni soċjali, inkluż fil-karrieri, permezz tal-ICT fl-Edukazzjoni; 
• inklużjoni soċjali: iż-żieda fir-rata ta’ parteċipazzjoni ta’ persuni żvantaġġati fl-attivitajiet pubbliċi, soċjali u ekonomiċi permezz ta’ proġetti ta’ inklużjoni soċjali. 

Ostaklu ieħor għall-parteċipazzjoni online huwa l-lingwa. Hemm 24 lingwa uffiċjali tal-UE u aktar minn 60 huma lingwi reġjonali u minoritarji. L-ebda lingwa waħedha ma tista’ tindirizza liċ-ċittadini tal-UE f’daqqa, u l-Internet għandu jirrifletti dan.  

L-UE qed tieħu azzjoni biex tippromwovi l-multilingwiżmu online. Fl-aħħar għaxar snin, investiet ’il fuq minn €200 miljun f’dan il-qasam. Nediet ukoll il-Faċilità Nikkollegaw l-Ewropa, li għandha servizz tal-eTranslation li jipprovdi traduzzjoni multilingwi lis-servizzi diġitali u lill-amministrazzjoni pubblika madwar l-UE.  

L-UE qed trawwem l-inklużjoni diġitali permezz ta’ oqsma ta’ politika oħra, bħall-ħiliet diġitali, l-għajxien attiv u l-għajxien b’apparat assistiv, u l-inklużjoni soċjali.