Déanfaidh na ceithre threoirthionscadal Fís 2020 líonra Eorpach inbhuanaithe um inniúlachtaí cibearshlándála a fhorbairt. Ar an lámh eile, cuirfidh siad cúraimí éagsúla chun feidhme amhail cásanna taispeántais cibearshlándála sa rShláinte, san airgeadas, sa teileachumarsáid, i gcathracha cliste, san iompar, sa Chibearraon, in oiliúint nó cláir chun dul i ngleic le gab scileanna cibearshlándála san Aontas agus chun réitigh nuálacha indíolta a sholáthar a dhéantar san Aontas chun dul i ngleic leis na dúshláin chibearshlándála thras-réimse a bheidh ann amach anseo. Comhoibreoidh na tionscadail go dlúth le chéile agus comhordóidh siad a ngníomhaíochtaí. Ina theannta sin, táthar ag súil go n-oibreoidh siad i gcomhar leis an éiceachóras cibearshlándála Eorpach chun an bealach a ndéantar taighde, nuálaíocht agus cur in úsáid na cibearshlándála a chur chun cinn san Eoraip, agus ar fud earnálacha ár ngeilleagair. Tá misean agus cuspóirí CONCORDIA, ECHO, SPARTA agus CyberSec4Europe i gcomhréir leis an smaoineamh atá taobh thiar den togra ón gCoimisiún Eorpach le haghaidh Rialachán Eorpach lena mbunaítear Lárionad Eorpach um Inniúlachtaí Tionsclaíochta, Teicneolaíochta agus Taighde Cibearshlándála agus Líonra de Lárionaid Chomhordúcháin Náisiúnta Cibearshlándála in 2021.
Seo mar a labhair Mariya Gabriel, an Coimisinéir um an nGeilleagar Digiteach agus an tSochaí Dhigiteach:
Táimid ag brath ar CONCORDIA, ECHO, SPARTA agus CyberSec4Europe chun cabhrú linn saineolas cibearshlándála na hEorpa a chomhthiomsú agus tírdhreach cibearshlándála na hEorpa a ullmhú chun ár bhfís le haghaidh Eoraip dhigiteach níos sláine a chur chun feidhme go héifeachtúil. Cuideoidh na tionscadail sin leis an Aontas samhail rialachais Líonra Eorpach um Inniúlachtaí Cibearshlándála de lárionaid barr feabhais cibearshlándála a shainiú, a thástáil agus a bhunú.
Leis na treoirthionscadail sin, tugtar le chéile níos mó ná 160 comhpháirtí, lena n-áirítear cuideachtaí móra, FBManna, ollscoileanna agus institiúidí taighde cibearshlándála, as 26 Bhallstát de chuid an Aontais. Beidh infheistíocht fhoriomlán an Aontais sna tionscadail sin níos mó ná 63.5 milliún Euro. Roghnaíodh CONCORDIA, ECHO, SPARTA agus CyberSec4Europe as measc 12 thogra incháilithe a fuair an Coimisiún Eorpach do ghlao SU-ICT-03-2018 ar Fhís 2020. Tá an glao seo mar chuid de shainréimse Fís 2020 ‘Borradh a chur faoi éifeachtacht an Aontais Slándála (SU)’.