Mar obair leantach ar Ghlao Nevers an 9 Márta 2022 agus ag tógáil ar an obair chomhordaithe a rinneadh cheana ar leibhéal an Aontais chun slándáil líonraí 5G a neartú, rinne na Ballstáit measúnú riosca ar bhonneagair agus líonraí cumarsáide na hEorpa.
Sainaithníodh sa mheasúnú riosca sin roinnt bagairtí ar líonraí cumarsáide agus ar bhonneagar, amhail cuimilteoirí, ionsaithe bogearraí éirice, ionsaithe sa slabhra soláthair, ionsaithe fisiciúla, sabaitéireacht, etc. D’fhéadfadh na bagairtí sin, agus leas á bhaint acu as leochaileachtaí, a bheith ina riosca suntasach do shlándáil agus d’athléimneacht an bhonneagair nascachta. Bunaithe ar na torthaí sin agus sa bhreis ar na naoi gcinn de chásanna riosca a sainaithníodh cheana imeasúnú riosca comhordaithe an Aontais ar líonraí 5G, forbraíonn an tuarascáil deich gcinn de chásanna riosca a bhfuil tábhacht straitéiseach ag baint leo don Aontas, amhail ionsaí ar an slabhra soláthair chun rochtain a fháil ar bhonneagar oibreoirí nó ionsaí sabaitéireachta fisiciúil comhordaithe ar bhonneagar digiteach.
Chun na rioscaí sin a mhaolú, cuirtear ar aghaidh sa tuarascáil roinnt moltaí straitéiseacha agus teicniúla do na Ballstáit, don Choimisiún agus do ENISA, atá le cur chun feidhme le tacaíocht ó Chomhlacht na Rialálaithe Eorpacha um Chumarsáid Leictreonach. Maidir le gnéithe straitéiseacha, moltar sa tuarascáil an méid seo a leanas a dhéanamh:
- Measúnú a dhéanamh ar athléimneacht idirnasc idirnáisiúnta;
- Measúnú a dhéanamh ar chriticiúlacht, athléimneacht agus iomarcaíocht an chroíbhonneagair Idirlín, amhail cáblaí fomhuirí;
- Na moltaí a bhaineann le soláthróirí sa dara Tuarascáil ar Dhul Chun Cinn maidir le cur chun feidhme Bhosca Uirlisí an Aontais a chur chun feidhme;
- Trédhearcacht a chruthú maidir le tírdhreach na soláthróirí agus an tsoláthraí seirbhíse bainistithe nó an tsoláthraí seirbhísí slándála bainistithe a úsáidtear le haghaidh líonraí fosaithe, teicneolaíocht snáithín, cáblaí fomhuirí, líonraí satailíte agus soláthraithe tábhachtacha eile TFC;
- Ról a thabhairt don earnáil cumarsáide leictreonaí i gcibearchleachtaí agus i gcomhoibriú oibríochtúil;
- Comhroinnt faisnéise a chothú agus feasacht staide ar bhagairtí d’oibreoirí a fheabhsú;
- Tacaíocht chistiúcháin a chur ar fáil d’oibreoirí le haghaidh bearta teicniúla i gcoinne cibirionsaithe ina líonraí;
- Dea-chleachtais a mhalartú i measc na n-údarás náisiúnta maidir le hionsaithe fisiciúla ar bhonneagar digiteach;
- Tástáil struis fhisiciúil ar bhonneagar criticiúil a leathnú chun bonneagar digiteach a chur san áireamh.
I bhfianaise chriticiúlacht na mbonneagar agus na líonraí i raon feidhme na tuarascála seo agus i bhfianaise thimpeallacht na bagartha atá ag athrú go tapa, agus gan dochar d’inniúlachtaí na mBallstát maidir leis an tslándáil náisiúnta, moltar do na Ballstáit, don Choimisiún agus do ENISA na bearta feabhsaithe athléimneachta sin a chur chun feidhme a luaithe is féidir, bunaithe ar an obair atá tosaithe cheana ar chur chun feidhme roinnt de na moltaí.
Cúlra
An 9 Márta 2022, d’eagraigh an cruinniú neamhfhoirmiúil a bhí ag an gComhairle na nAirí Teileachumarsáide in Nevers (an Fhrainc) glao comhpháirteach chun cumais chibearshlándála an Aontais a threisiú. I bpointe 4 den ghlao, iarrtar ar na húdaráis náisiúnta ábhartha, amhail Comhlacht na Rialálaithe Eorpacha um Chumarsáid Leictreonach (BEREC), ENISA, agus Grúpa Comhair NIS moltaí a chur faoi bhráid Bhallstáit an Aontais agus an Choimisiúin bunaithe ar mheasúnú riosca chun athléimneacht bhonneagair agus líonraí cumarsáide an Aontais a threisiú.
Tuilleadh eolais faoi nascacht agus cibearshlándáil, beartais, straitéis 5G na hEorpa agus deiseanna cistiúcháin a bhaineann le nascacht cnámh droma.