Cuibhreannas CHIPDIPLO roghnaithe chun tacú le taidhleoireacht idirnáisiúnta maidir le leathsheoltóirí

Tá an cuibhreannas dea-nasctha laistigh de chiorcail lucht tionscail agus lucht ceaptha beartas ar fud na mBallstát. Tá cuntas teiste cruthaithe aige maidir le hidirphlé beartais agus comhpháirtíochtaí rathúla le príomhmheithleacha machnaimh i Meiriceá agus san Áise.

Leis an nglao ar thograí, iarradh gníomhaíochtaí píolótacha chun idirphlé a bhunú i measc gníomhaithe neamhstáit Eorpacha, amhail eagraíochtaí tionscail agus eagraíochtaí na sochaí sibhialta, a bhfuil saineolas agus ról straitéiseach acu in earnáil na leathsheoltóirí, chomh maith le caidreamh le tríú tíortha a neartú mar ghné thábhachtach chun éiceachóras leathsheoltóirí Eorpach níos athléimní a bhaint amach.

Tá sé mar aidhm ag CHIPDIPLO luach fadtéarmach a chruthú trí thrí phríomhchuspóir:

• feabhas a chur ar mheastóireacht riosca agus ar chomhroinnt faisnéise i measc gheallsealbhóirí leathsheoltóirí an Aontais,
• comhordú inmheánach a fheabhsú,
• for-rochtain idirnáisiúnta éifeachtach a chothú trí chomhpháirtíochtaí seachtracha cothroma.

Mar thríú páirtí neodrach, éascóidh an cuibhreannas idirphlé, déanfaidh sé taighde agus spreagfaidh sé iarrachtaí abhcóideachta. Tá sé beartaithe ag an gcuibhreannas idirphlé rian-2 a óstáil ina ndíreofar ar an méid seo a leanas:

1. Athléimneacht an tslabhra soláthair,
2. Neamhspleáchas, fíor-riachtanas agus spleáchais sheachtracha a bhainistiú,
3. Dea-chleachtais sa bheartas tionsclaíoch, nuálaíochta agus trádála,
4. Forbairt an fhórsa saothair,
5. Iomaíochas, teicneolaíocht agus inbhuanaitheacht,
6. Airmiú slabhraí luacha le linn iomaíocht idir na Stáit Aontaithe agus an tSín,
7. Cásanna géarchéime.

Cuirfidh seimineáir ghréasáin tionscail ardán ar fáil do phlé macánta i measc gníomhaithe neamhstáit Eorpacha agus domhanda. Cuirfidh an cuibhreannas páipéir bheartais ar fáil agus cuirfidh sé le huirlisí faireacháin amhail Monatóir Riosca Leathsheoltóirí an Aontais, uirlis inmheánach do lucht ceaptha beartas, lena dtacaítear le nuashonruithe míosúla don Choimisiún, agus Léarscáil Idirghníomhach Éiceachóras Leathsheoltóirí an Aontais chun feabhas a chur ar an intleacht chomhchoiteann agus chun tacú leis na Ballstáit.

Cuireadh tús leis an tionscadal roghnaithe an 1 Márta agus mairfidh sé 18 mí. Is éard atá sa chuibhreannas:

Tuilleadh eolais ar shuíomh gréasáin CHIPDIPLO (ag teacht go luath).