iStock photo Getty images plus
Ar an gcéad dul síos, díreoidh an príomhchlár oibre leasaithe le buiséad 2024 de bheagnach EUR 549 milliún ar thionscadail a chur in úsáid a úsáideann teicneolaíochtaí digiteacha amhail sonraí, néalríomhaireacht, agus ardscileanna digiteacha. Leis an gclár oibre, cuirfear tacaíocht ar fáil chun tionscadail iltíre de chuid na Deacáide Digití a chur chun feidhme go rianúil, lena n- áirítear deiseanna do Chuibhreannais Eorpacha don Bhonneagar Digiteach (EDICanna). Tacóidh gníomhaíochtaí nua le cur chun feidhme an Ghnímh um an Intleacht Shaorga agus le héiceachóras intleachta saorga Eorpach a fhorbairt, lena n-áirítear go háirithe FBManna.
Tá an EUR 214 mhilliún atá fágtha le haghaidh 2024 curtha i leataobh ag an gCoimisiún don chibearshlándáil, chun athléimneacht chomhchoiteann an Aontais i gcoinne cibearbhagairtí a fheabhsú. Is é an Lárionad Eorpach um Inniúlachtaí Cibearshlándála a chuirfidh na gníomhaíochtaí a chistítear faoin gclár oibre seo chun feidhme.
Seo mar a labhair Margrethe Vestager, Leas-Uachtarán Feidhmiúcháin:
Tá an Clár don Eoraip Dhigiteach ríthábhachtach chun cistiú an Aontais agus cistiú náisiúnta a chomhthiomsú chun tionscadail dhigiteacha uaillmhianacha a bhaint amach nach féidir le haon Bhallstát a dhéanamh ina aonar. Tá sé ríthábhachtach go leanfaidh an Eoraip de thacaíocht a thabhairt do spriocanna na ndeich mbliana digiteacha agus béim níos mó á leagan ar scileanna digiteacha, ar bharr feabhais san intleacht shaorga, agus ar an gcibearshlándáil.
Is é a dúirt an Coimisinéir Thierry Breton:
Cuireann an Clár don Eoraip Dhigiteach ceannaireacht agus ceannasacht na hEorpa i dteicneolaíochtaí digiteacha chun cinn. Cuirfidh sé leis an gcomhaontú a rinneadh le déanaí maidir le Gníomh um an Intleacht Shaorga de chuid an Aontais agus cuirfidh sé borradh faoi éiceachóras nuathionscanta Eorpach atá faoi bhláth a fhorbairt. Ina theannta sin, cuirfidh sé ar ár gcumas uas-scálú a dhéanamh go comhpháirteach ar ár gcumais sa néal, i sonraí agus sa chibearshlándáil, lena n-áirítear na scileanna digiteacha riachtanacha.
Foilseofar na chéad ghlaonna ar an gClár don Eoraip Dhigiteach go luath in 2024, agus níos mó le teacht san earrach.