I gcomhthráth leis na gníomhaíochtaí sin, leanann an Coimisiún de bheith ag obair chun Treoir neamhcheangailteach ón gCoimisiún a chur ar fáil maidir le caighdeáin choiteanna Eorpacha agus maidir le ceanglais choiteanna Eorpacha do sholáthar poiblí seirbhísí próiseála sonraí bunaithe ar ionchur ón gComhghuaillíocht.
Is iarracht chomhchoiteann é an treochlár tionsclaíoch straitéiseach néalríomhaireachta nuashonraithe de phríomhghníomhaithe thionscal néalríomhaireachta agus imeall na hEorpa chun réimsí infheistíochta a shainaithint le haghaidh forbairt chomhpháirteach agus imlonnú na chéad ghlúine eile de theicneolaíochtaí néalríomhaireachta agus imeall na hEorpa. Is ionchur ríthábhachtach é don Choimisiún Eorpach i sainiú na gclár infheistíochta digití Eorpach atá ar na bacáin, rud a chinntíonn go bhfuil siad ag teacht le straitéisí, riachtanais agus spriocanna ghnólachtaí na hEorpa. Ar an iomlán, neartóidh an treochlár seasamh na hEorpa i dteicneolaíochtaí néalríomhaireachta agus imeall agus cothóidh sé teacht chun cinn éiceachóras tionsclaíoch agus margadh tionsclaíoch Eorpach atá bríomhar agus iomaíoch.
Tá riachtanais slándála níos déine fós ag earnáil na nAerloingseoireachta, na Slándála agus na Cosanta agus iad ag láimhseáil faisnéise sa néal. Tá an easpa comhchuibhithe maidir le creidiúnú néalréitigh agus ardáin chomhoibríocha néalbhunaithe, chomh maith le cosaint agus slándáil faisnéise íogaire a chumhdódh saolré iomlán na gclár agus na dtionscadal tionsclaíoch san earnáil sin ar cheann de na príomhdhúshláin a spreag iarracht na meithle sin. Is é an toradh atá air sin tacar ceanglas feidhmiúil a bhaineann le hardán comhoibrithe digití tionsclaíche a d’fhéadfadh a bheith ann, lena réiteofar an bealach do chreat caighdeánaithe, an-slán agus creidiúnaithe le haghaidh struchtúr néalbhunaithe comhair agus lena rialachas, rud a chruthóidh muinín i measc na mBallstát agus a chosnóidh sonraí ó rochtain neamhúdaraithe.
Ar deireadh, mar atá beartaithe sa Straitéis Sonraí, tá an Coimisiún ag obair faoi láthair freisin chun Treoir neamhcheangailteach ón gCoimisiún a chur ar fáil maidir le caighdeáin choiteanna agus ceanglais choiteanna Eorpacha maidir le soláthar poiblí seirbhísí próiseála sonraí. Cinnteoidh an Treoir cur chuige comhchuibhithe Eorpach maidir le soláthar poiblí na seirbhísí sin agus na cleachtais chomhfhreagracha i gcomhlachtaí earnála poiblí ar fud na mBallstát. Chun riachtanais agus ceanglais riaracháin phoiblí na mBallstát a léiriú, ullmhaíodh ionchur don Treoir i gcomhar le saineolaithe ó na Ballstáit ag teacht le chéile dóibh faoi Ghrúpa Néalchomhair Bhallstáit na Comhghuaillíochta. Mar chuid den dara Fóram de chuid na gComhghuaillíochta, chuaigh an Coimisiún i gcomhairle le raon leathan páirtithe leasmhara ábhartha freisin, lena n-áirítear soláthraithe seirbhísí próiseála sonraí agus tomhaltóirí a ndéanfar a n-aiseolas a bhreithniú go cuí agus an Treoir atá le teacht á dréachtú.
An Treochlár Eorpach um Theicneolaíocht Thionsclaíoch don Chéad Ghlúin Eile