iStock photo Getty Images plus
Tá an uirlis ar fáil ar Ardán an Aontais um Scileanna Digiteacha agus Poist agus Europass i ngach ceann de 24 theanga oifigiúla an Aontais, agus sa Tuircis, sa tSeirbia, sa Mhacadóinis, san Ioruais agus san Íoslainnis.
Bunaithe ar an gCreat Inniúlachta Digití cumhdaíonn an triail saor in aisce seo litearthacht faisnéise agus sonraí, cumarsáid agus comhoibriú, cruthú ábhair dhigitigh, sábháilteacht agus réiteach fadhbanna. Tar éis na tástála, gheobhaidh an freagróir measúnú ar a leibhéal scileanna a chabhróidh leo a aithint conas feabhas a chur ar an oiliúint agus cén áit ar féidir an oiliúint is oiriúnaí a aimsiú.
Seo mar a labhair Thierry Breton, an Coimisinéir um an Margadh Inmheánach:
Chun go n-éireoidh leis an Eoraip ina haistriú digiteach, ní mór dúinn infheistíocht a dhéanamh i scileanna digiteacha do chách, ionas go mbeidh leibhéal scileanna digiteacha againn go léir a chuirfidh ar ár gcumas an t-idirlíon agus uirlisí teicneolaíochta a úsáid. Beidh an uirlis nua féinmheasúnaithe ar líne seo atá á seoladh againn inniu ar fáil dúinn saor in aisce agus cabhróidh sé linn tuiscint a fháil ar cé chomh oilte is atáimid go digiteach, agus cá háit agus conas is féidir linn feabhas a chur air.
Le blianta fada anuas, tá tionscadail agus straitéisí á gcur chun cinn ag an gCoimisiún chun feabhas a chur ar leibhéal na scileanna digiteacha ar fud na hEorpa. Cuireann an tArdán Eorpach um Scileanna Digiteacha agus Poist Dhigiteacha, a fhaigheann tacaíocht ó Chlár na Saoráide um Chónascadh na hEorpa, faisnéis agus acmhainní ar fáil maidir le scileanna digiteacha, chomh maith le deiseanna oiliúna agus maoinithe. Chomh maith leis sin, leanann seoladh na huirlise nua féinmheasúnaithe ar líne do scileanna digiteacha an Comhshocrú do Scileanna, ina n-iarrtar ar eagraíochtaí poiblí agus príobháideacha teacht le chéile agus gníomhaíocht nithiúil a dhéanamh chun daoine san Eoraip a uas-sciliú agus a athsciliú. Tacóidh an uirlis freisin leis an dara tosaíocht a leagtar síos sa Phlean Gníomhaíochta don Oideachas Digiteach 2021-2027, eadhon feabhas a chur ar scileanna agus inniúlachtaí digiteacha don chlaochlú digiteach. Ina theannta sin, faoin gcompás digiteach atá beartaithe i nDeich mBliana Digiteacha na hEorpa, tá sé leagtha síos ag an gCoimisiún an cuspóir gur cheart bunscileanna digiteacha a bheith ag 80 % ar a laghad de na daoine fásta go léir faoi 2030, agus go mbeadh 20 milliún saineolaí TFC fostaithe san Aontas, le cóineasú idir mná agus fir.
Tástáil do scileanna digiteacha agus rathú sa saol digiteach