Seoladh grúpa na nÚdarás Inniúil Eorpach um Chumarsáid Leictreonach Shlán breis agus 10 mbliana ó shin agus is ardán é le haghaidh comhoibriú agus malartú faisnéise i measc na n-údarás náisiúnta a dhéanann maoirseacht ar shlándáil teileachumarsáide san Eoraip. Forbraíonn agus formhuiníonn grúpa ECASEC treoirlínte d’údaráis slándála teileachumarsáide maidir le conas gnéithe éagsúla de bheartas slándála teileachumarsáide an Aontais a chur chun feidhme.
Príomhphointí ón 35ú cruinniú de Ghrúpa Saineolaithe ECASEC
D’fhreastail níos mó ná 50 saineolaí ar an iomlán ó údaráis náisiúnta a dhéanann maoirseacht ar earnáil teileachumarsáide na hEorpa san Aontas, i CSTE, in LEE agus i dtíortha is iarrthóirí ar bhallraíocht san Aontas Eorpach ar an gcruinniú a tionóladh an 14 Deireadh Fómhair, agus bhí beagnach aon trian díobh i láthair go fisiciúil.
Deis a bhí ag an gcruinniú do na saineolaithe anailís a dhéanamh ar thimpeallacht bhagartha an tslabhra soláthair a d’fhoilsigh ENISA le déanaí. Ina theannta sin, thíolaic BEREC a thuarascáil maidir le suíomh na bPointí Foirceannadh Gréasáin. Tá tionchar ag suíomh na bPointí Foirceannadh Gréasáin ar cé acu atá nó nach bhfuil trealamh ina chuid den líonra poiblí nó ina chuid den trealamh teirminéil teileachumarsáide (TTE) agus tá tionchar ag an idirdhealú sin ar chumhacht dhlíthiúil na nGníomhaireachtaí Rialála Náisiúnta (NRAnna).
Thug ENISA príomhphointí thuarascálacha ENISA maidir le Slándáil For-rochtana agus Fíorúiliú Gréasáin (NFV) atá ar na bacáin isteach agus d’éist rannpháirtithe le hanailís ar ionsaithe Rúndachta, Sláine agus Barántúlachta i líonraí cumarsáide leictreonaí poiblí. Tá an cineál ionsaithe sin an-spéisiúil do chomhaltaí Ghrúpa Saineolaithe ECASEC ós rud é go n-áirítear rúndacht chumarsáide sa sainmhíniú ar shlándáil in CCLE.
Ar deireadh, chuaigh an grúpa isteach in éaradh Facebook le déanaí agus leag sé béim ar an ngá atá leis an bpróiseas tuairiscithe teagmhas a chuíchóiriú chun oibleagáidí doiléire agus forluiteacha ar sholáthraithe a sheachaint agus chun teagmhais trasteorann a bhaineann le roinnt tíortha a chumhdach go héifeachtach.
Chomh maith le cruinniú ECASEC, reáchtáil Gníomhaireacht an Aontais Eorpaigh um Chibearshlándáil (ENISA) an1d heagrán d’ Fhóram Slándála Teileachumarsáide ENISA an 13 Deireadh Fómhair. Ba é sprioc an imeachta sin, a reáchtáladh i bhformáid hibrideach, saineolaithe ó na húdaráis náisiúnta agus ón earnáil phríobháideach araon a thabhairt le chéile chun tuairimí a mhalartú agus dúshláin chibearshlándála agus dea-chleachtais a phlé.
Thairis sin, rinne ENISA Sruth Oibre Ghrúpa Comhair NIS 10 (WS10) a óstáil, an grúpa d’údaráis náisiúnta an Aontais a dhéanann maoirseacht ar shlándáil an bhonneagair dhigitigh faoi Threoir NIS, an lá roimh an bhFóram Slándála Teileachumarsáide. Lá an Fhóraim, bhí cruinniú comhpháirteach ag comhaltaí Ghrúpa Saineolaithe ECASEC agus WS10 chun plé a dhéanamh ar bhagairtí comhchoiteanna, ar dhúshláin agus ar shineirgí a d’fhéadfadh a bheith ann.