Tagann tuarascáil ENISA ó tharla go bhfuil an Coimisiún Eorpach ag dul ar aghaidh i mbliana leis an tionscnamh Spás Eorpach Sonraí Sláinte chun malartú sábháilte sonraí othar agus rochtain ar shonraí sláinte a chur chun cinn.
Chuir paindéim COVID-19 béim ar an ngá méadaithe atá le seirbhísí cúraim sláinte digiteacha atá éifeachtúil agus slán. Le réitigh néalríomhaireachta, is féidir stóráil leictreonach sonraí agus cumarsáide leictreonaí amhail teilileigheas a chur in úsáid go solúbtha agus go tapa. Mar sin féin, chuir castacht na gcóras dlí agus na dteicneolaíochtaí nua, chomh maith le hábhair imní maidir le slándáil sonraí íogaire othar, moill ar an earnáil cúraim sláinte maidir le néalseirbhísí a ghlacadh.
Tugtar aghaidh sa tuarascáil ar na hábhair imní sin trí threoirlínte slándála a chur ar fáil do thrí phríomhréimse ina n-úsáideann earnáil an chúraim sláinte néalseirbhísí, eadhon:
- Taifead Sláinte Leictreonach (EHR), i.e. córais lena ndírítear ar shonraí sláinte a bhailiú, a stóráil, a bhainistiú agus a tharchur, amhail faisnéis d’othair agus torthaí scrúduithe leighis;
- Cianchúram, i.e. an fo-thacar den teilileigheas a thacaíonn le comhairliúcháin chianda othar-dochtúirí;
- Feistí Leighis, i.e. néalseirbhísí a thacaíonn le hoibriú feistí leighis amhail sonraí faoi fheistí leighis a chur ar fáil do gheallsealbhóirí éagsúla nó chun faireachán a dhéanamh ar fheistí.
I gcás gach ceann de na cásanna úsáide sin, leagtar béim sa tuarascáil ar na príomhthosca atá le cur san áireamh nuair a dhéanann eagraíochtaí cúraim sláinte an measúnú riosca ábhartha — mar shampla, i dtéarmaí riosca do shonraí íogaire othar nó infhaighteacht seirbhíse leighis. Níl sna treoirlínte sin, áfach, ach an chéad chéim do sholáthraithe cúraim sláinte chun iad féin a chur in oiriúint go slán don néal. Tá gá le tuilleadh tacaíochta, amhail caighdeáin sheanbhunaithe tionscail maidir le slándáil néalríomhaireachta, treoir shonrach ó údaráis náisiúnta agus ó údaráis an Aontais, agus treoirlínte breise ó Údaráis Cosanta Sonraí maidir le sonraí cúraim sláinte a aistriú chuig an néalríomhaireacht.
Moltar sa tuarascáil freisin sraith beart slándála le haghaidh eagraíochtaí cúraim sláinte a chur chun feidhme agus iad ag pleanáil a n-aistriú chuig néalseirbhísí, amhail próisis a bhunú le haghaidh bainistiú teagmhas, ceanglais chriptiúcháin sonraí a shainiú, agus inaistritheacht agus idir-inoibritheacht sonraí a áirithiú. Tá na bearta beartaithe agus aird á tabhairt ar dhréachtscéim deimhniúcháin cibearshlándála iarrthach an Aontais maidir le Néalseirbhísí (EUCS) chun comhoiriúnacht agus mapáil ceanglas a áirithiú. Tá dréachtscéim na Gníomhaireachta mar chuid den chreat um dheimhniú i ndáil le cibearshlándáil atá dírithe ar mhuinín as táirgí, seirbhísí agus próisis TFC ar fud na hEorpa a fheabhsú. Tá an dréachtscéim ar oscailt le haghaidh comhairliúchán poiblí go dtí an 7 Feabhra 2021.