Tabharfar rannpháirtithe ardleibhéil ó gach cearn den domhan le chéile ag an ócáid chun machnamh a dhéanamh ar an dul chun cinn atá déanta maidir le cur chun feidhme straitéis na Tairsí Domhanda.
Seo mar a labhair Ursula von der Leyen, Uachtarán an Choimisiúin Eorpaigh:
I ndomhan ina bhfuil méadú ag teacht ar an éagobhsaíocht agus ar dhúshláin chomhroinnte dhomhanda, tá cairde iontaofa de dhíth ar ár dtíortha comhpháirtíochta. Leis an Tairseach Dhomhanda, cuireann an tAontas Eorpach dlús lena iarrachtaí agus cuireann sé comhpháirtíocht ar fáil atá bunaithe ar luachanna frithpháirteacha agus ar chuspóirí coiteanna le haghaidh infheistíochtaí glasa, cliste agus cuimsitheacha. Táim ag tnúth le fáilte a chur roimh cheannairí polaitiúla, ionadaithe ón tsochaí shibhialta agus ón earnáil phríobháideach ó gach cearn den domhan go dtí Laethanta Forbraíochta na hEorpa, áit a bpléifimid cur chun feidhme nithiúil na Tairsí Domhanda.
Dúirt an Coimisinéir um Chomhpháirtíochtaí Idirnáisiúnta, Jutta Urpilainen:
Tá sé d’aidhm ag an Tairseach Dhomhanda suas le EUR 300 billiún d’infheistíocht a shlógadh faoi 2027, i gcur chuige Fhoireann na hEorpa idir an tAontas Eorpach, na Ballstáit, institiúidí airgeadais forbartha, agus an earnáil phríobháideach. Is díol sásaimh den chuid is mó é Tionscnamh na Tairsí Domhanda, agus tá a rannchuidiú nithiúil curtha i láthair cheana féin ag roinnt Ballstát. Beidh Laethanta Forbraíochta na hEorpa ar an bpríomhimeacht in 2022 chun plé a dhéanamh ar conas is féidir linn, mar Fhoireann na hEorpa, oibriú le tíortha comhpháirtíochta, lena n-áirítear an earnáil phríobháideach agus gnólachtaí Eorpacha, chun tionscnaimh shuaitheanta a chur i gcrích.