Tuarascáil Tíre na Laitvia 2024 maidir leis an Deacáid Dhigiteach

Dhá phríomhláidreacht nó réimsí dul chun cinn

Digitiú FBManna agus glacadh néalríomhaireachta ag fiontair

In 2023, rinne an Laitvia dul chun cinn maith maidir le digiteáil FBManna. Tháinig feabhas 12.5 % ar sciar na bhfiontar a bhfuil bunleibhéal scileanna digiteacha ar a laghad acu agus, cé go bhfuil sé fós faoi bhun mheán an Aontais (57.7 %), shroich sé 48.2 %. Rinneadh dul chun cinn den chineál céanna maidir le glacadh foriomlán an néil ag fiontair, ar tháinig méadú 14.3 % air.

Seirbhísí poiblí agus ríomh-shainaitheantas a dhigitiú

Maidir le seirbhísí poiblí do dhaoine (le scór 88.2) agus gnólachtaí (87.2) araon, tá an Laitvia rangaithe os cionn mheán an Aontais (79.4 agus 85.4 faoi seach). Chomh maith leis sin ar r-Shláinte taifeadann an Laitvia feidhmíocht mhaith, a sháraíonn scór an AE (84.8 in aghaidh 79.1 san AE).

Dhá phríomhlaigí nó réimsí le feabhsú

Bonneagar nascachta

Maidir le cumhdach Snáithín go hÁitreabh (FTTP), líonraí fíor‐ardacmhainneachta (VHCN) agus 5G, titeann an Laitvia faoi bhun mheán an Aontais. Is ionann cumhdach líonraí fíor-ardacmhainneachta agus FTTP agus 71.5 % (i gcomparáid le 78.8 % san Aontas) agus 61.9 % (64 % san Aontas) faoi seach. D’ainneoin an dul chun cinn, is ionann cumhdach bunúsach 5G agus 53.1 % (89.3 san Aontas).

Bunscileanna digiteacha agus speisialtóirí TFC

D’ainneoin iarrachtaí, in 2023, níl bunleibhéal scileanna digiteacha ar a laghad ach ag 45.3 % den daonra, faoi bhun mheán an Aontais de 55.6 %, agus léiríonn sé laghdú ó 2022 i leith (bhí bunscileanna digiteacha ar a laghad ag 50.8 % den daonra). In 2023, bhí 4.4 % den fhostaíocht (mar an gcéanna le 2022 agus faoi bhun mheán an Aontais de 4.8 %) ag speisialtóirí TFC agus thuairiscigh beagnach 60 % d’fhiontair go raibh sé deacair folúntais do ghairmithe TFC a líonadh.

Treochlár straitéiseach na Laitvia maidir leis an Deacáid Dhigiteach

Léirítear i dtreochlár na Laitvia go bhfuil iarracht shuntasach beartaithe ag an tír chun cuspóirí agus spriocanna na Deacáide Digití a bhaint amach. Leagtar síos ann spriocanna le haghaidh 12 as 14 eochairtháscaire feidhmíochta (KPInna) agus, sa chuid is mó de na cásanna, tá na spriocanna ailínithe le huaillmhianta 2030 an Aontais. Chun a claochlú digiteach a bhaint amach, tá sé beartaithe ag an Laitvia buiséad iomlán a leithdháileadh (gan infheistíochtaí príobháideacha san áireamh) a mheastar a bheith cothrom le EUR 1.8 billiún (4.5 % OTI).  

Cearta agus prionsabail dhigiteacha

Léirítear san Eorabharaiméadar Speisialta ‘Deich mBliana Digiteacha 2024’ nach gcreideann ach 42 % de mhuintir na Laitvia go gcosnaíonn an tAontas a gcearta digiteacha go maith (-16 % i gcomparáid le 2023). Tá muinín sa phríobháideachas digiteach ag 48 %, níos lú ná meán an Aontais (45 %). I measc na n-ábhar imní tá sábháilteacht timpeallachtaí digiteacha do leanaí (56%) agus rialú ar shonraí pearsanta (38%), le laghdú suntasach ar mhuinín. Leagtar béim sna torthaí sin ar an ngá atá le cearta digiteacha a threisiú ar an leibhéal náisiúnta. I measc na dtreochtaí dearfacha tá an tábhacht a bhaineann le teicneolaíochtaí digiteacha chun nascadh le cairde agus le teaghlaigh (90 %), méid atá go mór os cionn mheán 83 % an Aontais. 

Moltaí a bhaineann go sonrach le tír faoi leith

Ní mór don Laitvia feabhas a chur ar a feidhmíocht i dtreo spriocanna agus cuspóirí na Deacáide Digití, chun iomaíochas, athléimneacht agus ceannasacht a chothú, agus chun luachanna Eorpacha agus gníomhú ar son na haeráide a chur chun cinn. 

Chun tuilleadh faisnéise agus liosta iomlán na moltaí a fháil, féach an tuarascáil.