Ó thaobh na cibearshlándála de, tiomnófar €35 mhilliún do thionscadail lena gcosnaítear suiteálacha tionsclaíocha móra agus bonneagair chriticiúla. Infheisteofar €12,8 milliún eile chun Lárionaid Oibríochta Cibearshlándála (SOCanna) náisiúnta agus trasteorann araon a bhunú, a mhéadú agus chun tacú leo a thuilleadh. Díreofar €35 mhilliún ar theicneolaíochtaí agus uirlisí cibearshlándála úrscothacha a chur in úsáid. Úsáidfear €20 milliún chun tacú leis na Ballstáit dlíthe an Aontais maidir leis an gcibearshlándáil agus Straitéisí Náisiúnta Cibearshlándála a chur chun feidhme. Is é an 21 Eanáir 2025 an spriocdháta chun iarratas a dhéanamh ar an gcistiú sin ar fad a bhaineann leis an gcibearshlándáil.
Maidir le hinniúlachtaí scileanna digiteacha, infheisteofar €55 mhilliún in ardscileanna digiteacha, chun cláir ardoideachais a dhearadh agus a sholáthar i bpríomhréimsí teicneolaíochta digití. Chun cabhrú leis na Ballstáit spriocanna agus cuspóirí na Deacáide Digití a bhaint amach, infheisteofar €25 mhilliún i ngníomhaíochtaí chun cur i bhfeidhm tionscadal ilnáisiúnta éagsúil a éascú trí Chuibhreannais don Bhonneagar Digiteach Eorpach (EDICanna). Tá €20 milliún eile de chuid an Aontais curtha i leataobh chun leathchúplaí digiteacha áitiúla Eorpacha (leaganacha digiteacha de phobail áitiúla) a fhorbairt a thuilleadh. Infheisteofar €8 milliún i bhFaireachlanna Eorpacha um na Meáin Dhigiteacha (EDMOanna) chun maoiniú a dhéanamh ar obair na mol réigiúnach neamhspleách chun anailís a dhéanamh ar an mbréagaisnéis sna meáin dhigiteacha agus chun dul i ngleic léi. Is é an 21 Samhain 2024 an spriocdháta le haghaidh iarratas ar an gcistiú sin ar fad atá nasctha le scileanna digiteacha.
Tá tuilleadh eolais faoi chlár oibre cibearshlándála an Chláir don Eoraip Dhigiteach agus faoi phríomhchlár oibre an Chláir don Eoraip Dhigiteach. Tá tuilleadh eolais faoi na glaonna ar thograí le fáil anseo. Foilseofar tuilleadh glaonna an bhliain seo chugainn tar éis ghlacadh an Chláir Oibre don Eoraip Dhigiteach 2025 – 2027.
Tá tuilleadh eolais faoi ghlaonna cibearshlándála le fáil anseo.