Europeana Foundation
Na cuspóirí
Molann an Coimisiún do na Ballstáit dlús a chur le digitiú gach séadchomhartha agus láithreáin, réada agus déantán oidhreachta cultúrtha do na glúine atá le teacht, chun iad siúd atá i mbaol a chosaint agus a chaomhnú, agus borradh a chur faoina n-athúsáid i réimsí amhail an t-oideachas, an turasóireacht inbhuanaithe agus earnálacha cruthaitheacha cultúrtha.
Molann an Coimisiún do na Ballstáit digitiú a dhéanamh faoi 2030 ar na séadchomharthaí agus ar na láithreáin ar fad atá i mbaol a ndíghrádaithe agus a leath de na séadchomharthaí agus na láithreáin sin a mbíonn turasóirí an-mhinic orthu.
Rannchuideoidh an moladh sin le cuspóirí na Deacáide Digití trí bhonneagar digiteach slán agus inbhuanaithe, scileanna digiteacha agus glacadh teicneolaíochtaí ag gnólachtaí, go háirithe FBManna, a chothú.
Cén spás sonraí a bheidh ann?
BeidhEuropeana, an t-ardán cultúrtha digiteach Eorpach, mar bhonn chun spás coiteann sonraí a thógáil don oidhreacht chultúrtha. Ligfidh sé do mhúsaeim, gailearaithe, leabharlanna, cartlanna ar fud na hEorpa na híomhánna digitithe oidhreachta cultúrtha a roinnt agus a athúsáid amhail samhlacha 3T de shuíomhanna stairiúla agus scanadh péintéireachta ar ardchaighdeán.
Seo mar a labhair Margrethe Vestager, an Leas-Uachtarán Feidhmiúcháin um Eoraip atá oiriúnach don Aois Dhigiteach:
Léirigh loscadh tragóideach Ardeaglais Notre Dame i bPáras a thábhachtaí atá sé an cultúr a chaomhnú go digiteach agus leag na dianghlasálacha béim ar an ngá atá le hoidhreacht chultúrtha atá beagnach inrochtana. Is iad bonneagar láidir sonraí i dteannta le comhthiomsú agus comhroinnt éasca sonraí na comhábhair is gá i spás coiteann sonraí Eorpach don oidhreacht chultúrtha.
Seo mar a labhair Thierry Breton, an Coimisinéir um an Margadh Inmheánach:
Tá caomhnú oidhreacht chultúrtha na hEorpa faoi chomaoin againn do na glúine atá le teacht. Chuige sin, ní mór ár gcumais theicneolaíocha féin a thógáil agus a úsáid, daoine agus gnólachtaí a chumasú chun taitneamh a bhaint as an oidhreacht seo agus an leas is fearr is féidir a bhaint aisti. Ní mór dúinn leas a bhaint as na deiseanna a eascraíonn as an intleacht shaorga, as sonraí agus as réaltacht leathnaithe. Leis an spás sonraí Eorpach don oidhreacht chultúrtha, cuirfear chun cinn cruthú agus nuálaíocht laistigh d’earnáil na hoidhreachta cultúrtha, agus níos faide i gcéin, san oideachas, sa turasóireacht, agus in earnálacha an chultúir agus na cruthaitheachta.
Conas a dhéanfar faireachán ar an gcur chun feidhme?
Ba cheart do na Ballstáit an Coimisiún a chur ar an eolas 24 mhí tar éis fhoilsiú an Mholta seo, agus gach 2 bhliain ina dhiaidh sin, faoi ghníomhaíochtaí a rinneadh mar fhreagairt ar an Moladh. Déanfaidh Grúpa Saineolaithe nuabhunaithe de chuid an Choimisiúin maidir leis an Spás Sonraí Eorpach coiteann don Oidhreacht Chultúrtha faireachán ar an dul chun cinn maidir le cur chun feidhme an mholta. Is ionadaithe ó na Ballstáit uile iad comhaltaí an Choiste.
Cúlra
Leanann an moladh sin an mheastóireacht a rinneadh ar an moladh roimhe seo maidir le hinrochtaineacht ar líne ábhar cultúrtha agus caomhnú digiteach (2011/711/AE).
Mar a fógraíodh sa straitéis Eorpach maidir le sonraí, déanfaidh an Coimisiún spásanna sonraí eile a fhorbairt agus a mhaoiniú i bpríomhearnálacha straitéise agus i réimsí a bhaineann le leas an phobail, amhail sláinte, talmhaíocht nó monaraíocht.
Fíricí Oidhreachta Cultúrtha
- Is ionann an turasóireacht chultúrtha agus suas le 40 % den turasóireacht ar fad san Eoraip;
- Cuireann tionscail chultúrtha agus chruthaitheacha 3.95 % de bhreisluach iomlán an Aontais Eorpaigh (EUR 477 mbilliún);
- Tá níos mó ná 8 milliún duine fostaithe ag tionscail an chultúir agus na cruthaitheachta, trí 1.2 milliún gnólacht — 99.9 % díobh sin ar FBManna iad;
- Faoi láthair, cuireann Europeana rochtain ar fáil ar 52 mhilliún sócmhainn oidhreachta cultúrtha, ar féidir 45 % díobh a athúsáid in earnálacha éagsúla;
- Is ionann íomhánna agus téacs agus 97.5 % de shócmhainní Europeana, gan ach 2.47 % d’ábhar closamhairc agus 0.03 % in 3D. Ba cheart borradh ollmhór a chur faoi shócmhainní 3T go háirithe, a bhuí leis an tionscnamh is déanaí seo.