Inniu, sheol an Coimisiún Eorpach rabharta nua glaonna ar dheiseanna cistiúcháin faoin gClár don Eoraip Dhigiteach (DIGITAL), lena leithdháiltear breis agus €108 milliún chun cumais dhigiteacha agus theicneolaíocha an Aontais a neartú. Leis na hinfheistíochtaí sin, spreagfar an Eoraip chun tosaigh, agus béim á leagan ar an intleacht shaorga (IS), ar chláir oideachais speisialaithe, ar thacaíocht do Thionscadail Ilnáisiúnta, agus ar dhul i ngleic leis an mbréagaisnéis. Is é an 21 Samhain 2024 an spriocdháta le haghaidh na nglaonna. Iarrtar sna glaonna sin infheistíochtaí straitéiseacha a chur i bhfeidhm a bheidh ríthábhachtach chun Deacáid Dhigiteach na hEorpa seo a dhéanamh.
Cláir Oideachais Speisialaithe
Leis an gclár DIGITAL infheisteofar €55 mhilliún in ardscileanna digiteacha, sainchláir oideachais i bpríomhréimsí digiteacha go sonrach: domhain fhíorúla, imeall-ríomhaireacht, ríomhaireacht chandamach, fótónaic, agus róbataic agus uathoibriú. Tacóidh an glao seo freisin le cláir idirdhisciplíneacha lena ndíreofar ar ardscileanna digiteacha glasa a fháil in earnálacha straitéiseacha roghnaithe: talmhaíocht, iompar, fuinneamh in-athnuaite, bainistiú dramhaíola, chomh maith le hardscileanna digiteacha a shealbhú don rialtas agus don earnáil phoiblí. Go nithiúil, ba cheart go dtacódh na tionscadail a roghnófar le cláir ardoideachais a dhearadh agus a sholáthar ag leibhéil ISCED 6, 7, 8 (idir bhaitsiléara agus dochtúireachta nó leibhéil choibhéiseacha) chomh maith le modúil neamhspleácha ghaolmhara a fhorbairt. Is é is aidhm don infheistíocht sin aghaidh a thabhairt ar an nganntanas speisialtóirí TFC, ag rannchuidiú leis an sprioc don Deacáid Dhigiteach de 20 milliún speisialtóir TFC san Aontas faoi 2030 agus cóineasú inscne san earnáil á chur chun cinn ag an am céanna.
Tacaíocht do Thionscadail Ilnáisiúnta
Le buiséad táscach €25 mhilliún, éascóidh an clár DIGITAL cur chun feidhme Tionscadal Ilnáisiúnta (MCPanna), lena n-áirítear i gcás inar roghnaíodh na Cuibhreannais don Bhonneagar Digiteach Eorpach (EDICanna) mar shásra cur chun feidhme. Tá na tionscadail mhórscála sin ceaptha chun cuidiú leis an Aontas na spriocanna agus na cuspóirí digiteacha a leagtar amach sa Chlár Beartais don Deacáid Dhigiteach a bhaint amach. Is é is aidhm dóibh cuidiú le hacmhainneachtaí criticiúla an Aontais a fhorbairt trí imscaradh nach bhféadfadh aon Bhallstát amháin a bhaint amach ina aonar. Le hinfheistíocht sna tionscadail sin, cumhdófar gníomhaíochtaí amhail bonneagair agus seirbhísí digiteacha coiteanna de chuid an Aontais a chur in úsáid, comhroinnt sonraí, rannpháirtíocht agus for-rochtain páirtithe leasmhara, agus fothú acmhainneachta. Ba cheart do na tionscadail a roghnófar scála a bhaint amach, páirt a thabhairt do roinnt Ballstát agus dearcadh fadtéarmach a bheith acu. Táthar ag súil go léireoidh siad breisluach soiléir AE agus go rannchuideoidh siad le bearnaí digiteacha a laghdú laistigh de na Ballstáit agus eatarthu.
Leathchúplaí Digiteacha Áitiúla
In iarracht shuntasach chun nasc, forbairt agus imscaradh Leathchúplaí Digiteacha Áitiúla (LDTanna) a chur chun cinn ar fud an Aontais, infheisteoidh an clár DIGITAL €20 milliún. Beidh sé d’aidhm ag na tionscadail rathúla cabhrú le cathracha agus pobail leas a bhaint as barainneachtaí scála i bhforbairt ardán sonraí agus i réitigh IS-bhunaithe. Tacóidh an cistiú le hidirnascadh TCTanna atá ann cheana, le cruthú TCTanna nua bunaithe ar riachtanais chomhroinnte, agus le huirlisí casta IS a chomhtháthú i mbosca uirlisí TCT. Déantar é sin d’fhonn an bonneagar digiteach sin a nascadh agus a mhéadú i dtreo ‘CitiVerse AE’ amach anseo. Meastar freisin go rannchuideoidh na hiarrachtaí sin leis an Tionscadal Ilnáisiúnta i réimse an Riaracháin Phoiblí Nasctha, go sonrach ‘Leathchúplaí Digiteacha Áitiúla Líonraithe i dtreo CitiVERSE (LDT CitiVERSE EDIC)’.
An Fhaireachlann Eorpach um na Meáin Dhigiteacha
Cuideoidh infheistíocht €8 milliún ón gclár DIGITAL leis na moil neamhspleácha réigiúnacha agus náisiúnta (EDMO) anailís a dhéanamh ar éiceachórais na meán digiteach. Díreoidh na moil ar fheachtais bhréagaisnéise a bhrath agus fíricí a sheiceáil, ar fheasacht an phobail a fheabhsú, agus ar fhreagairtí éifeachtacha a dhearadh don phobal i gcoitinne. Is é is aidhm don tionscnamh seo rannchuidiú leis an gcomhrac i gcoinne na bréagaisnéise, athléimneacht na sochaí i gcoinne na bréagaisnéise a neartú agus feabhas a chur ar an bhfaireachán a dhéantar ar bheartais na n-ardán ar líne sa réimse sin.
Cúlra
Is é an Clár don Eoraip Dhigiteach an chéad chlár cistiúcháin de chuid an Aontais atá dírithe ar an teicneolaíocht dhigiteach a thabhairt do ghnólachtaí agus do shaoránaigh. Agus buiséad iomlán beartaithe dar luach €7.5 billiún aige thar 7 mbliana, tá sé ag cur le claochlú digiteach shochaí agus gheilleagar na hEorpa, rud a rachaidh chun tairbhe do ghnólachtaí beaga agus meánmhéide go háirithe. Is le cláir oibre ilbhliantúla a chuirtear an Clár don Eoraip Dhigiteach chun feidhme.
Comhlánaíonn an Clár don Eoraip Dhigiteach infheistíochtaí faoi chláir eile de chuid an Aontais, amhail Fís Eorpach , EU4Health, InvestEU, an tSaoráid um Chónascadh na hEorpa, chomh maith le hinfheistíochtaí faoin tSaoráid Téarnaimh agus Athléimneachta. Foilsíodh an Rialachán lena mbunaítear an Clár don Eoraip Dhigiteach in Iris Oifigiúil an Aontais Eorpaigh an 11 Bealtaine 2021, tháinig sé i bhfeidhm an lá céanna, agus tá feidhm chúlghabhálach aige ón 1 Eanáir 2021.