iStock photo Getty images plus
Is stór rialála uathúil é an bunachar sonraí trédhearcachta a bhailíonn ráitis ar chúiseanna na n-ardán ar líne, a bhfuil sainordú acu iad a sholáthar faoin Ionstraim um Sheirbhísí Digiteacha (DSA) chun a mhíniú d’úsáideoirí cén fáth ar baineadh anuas nó ar srianadh rochtain ar ábhar. Is uirlis trédhearcachta ríthábhachtach é an bunachar sonraí trédhearcachta faoin Ionstraim um Sheirbhísí Digiteacha lena dtugtar rochtain nach bhfacthas a leithéid riamh ar shonraí maidir le modhnóireacht inneachair ar líne don phobal.
Ó seoladh é i mí Mheán Fómhair 2023, tá níos mó ná trí bhilliún ráiteas ar chúiseanna bailithe cheana féin sa bhunachar sonraí ar féidir le húsáideoirí iad a chuardach agus a íoslódáil. Anois, tá an chéad chéim eile á glacadh ag an gCoimisiún chun é a chur ar chumas páirtithe leasmhara, taighdeoirí, iriseoirí agus úsáideoirí leasmhara uile ábhar an bhunachair sonraí a fhiosrú agus anailís a dhéanamh air. Gheobhaidh úsáideoirí leathanach tuirlingthe nua, lena n-áirítear forléargas tapa ar an mbunachar sonraí, agus bainfidh siad tairbhe as roghanna scagtha feabhsaithe sa roinn íoslódála sonraí. Thairis sin, leis an deais nua beifear in ann iniúchadh a dhéanamh ar iliomad amharcléirithe idirghníomhacha a chuirfidh ar chumas úsáideoirí díriú ar na sonraí is mó a bhfuil suim acu iontu, gan aon taithí ríomhchlárúcháin a bheith ag teastáil.
Faoi láthair, níl sé d’oibleagáid ach ar na hardáin an-mhór ar líne (VLOPanna) a ainmníodh i mí Aibreáin 2023 an DSA a chomhlíonadh agus ráitis ar chúiseanna a chur isteach. Ag tosú an 17 Feabhra 2024, áfach, cuirfear tús le caibidil nua don bhunachar sonraí trédhearcachta de réir mar a thiocfaidh DSA i bhfeidhm ina iomláine agus beidh ar gach ardán ar líne, seachas micrifhiontair agus fiontair bheaga, sonraí a chur isteach maidir lena gcinntí modhnóireachta inneachair. Táthar ag súil go rachaidh ardáin i dteagmháil leis an gCoimisiún, atá ag obair go dlúth leis na Comhordaitheoirí Seirbhísí Digiteacha ionchasacha chun a áirithiú go gcuirfear ráitis na n-ardán sin ar chúiseanna isteach sa bhunachar sonraí gan uaim.
Tá an Coimisiún tiomanta i gcónaí do thrédhearcacht ar líne a chothú trí shásraí uile na hIonstraime um Sheirbhísí Digiteacha. Comhlánaítear an bunachar sonraí trédhearcachta leis an mbunachar téarmaí agus coinníollacha, rochtain éigeantach ar shonraí do thaighdeoirí, foilsiú éigeantach tuarascálacha trédhearcachta, agus tuilleadh nach iad. I dteannta a chéile, déanann gach ceann de na tionscnaimh sin a chion féin chun a chinntiú go bhfuil an t-idirlíon sábháilte agus cothrom do chách.