Dlús á chur leis an gcomhar digiteach idir an tAontas agus an Astráil

Is é is aidhm don Idirphlé Digiteach idir an tAontas agus an Astráil claochlú digiteach cuimsitheach a chur chun cinn agus an nuálaíocht a chothú. Tá tiomantas láidir ag an dá chomhpháirtí don daonlathas, don smacht reachta agus do chearta an duine. I ndomhan digiteach atá ag athrú go tapa, chinn an tAontas agus an Astráil a n-idirphlé digiteach a atosú tar éis sos mar gheall ar an bpaindéim.

Tráth an Idirphlé Dhigitigh, chomhaontaigh an tAontas agus an Astráil go méadófaí an comhar córasach ar ardáin agus, mar chéim nithiúil shonrach, shínigh siad Comhaontú Riaracháin chun tacú le forfheidhmiú rialacháin na meán sóisialta. Chomh maith leis sin, mhalartaigh na Comhpháirtithe faisnéis maidir leis an intleacht shaorga (IS): roinneann an tAontas a thaithí maidir leis annGníomh um an Intleacht Shaorga atá ag teacht i bhfeidhm faoi láthair a chur ar bun, agusconasa bheidh COF IS ag treorú gníomhaíochtaí taighde agus nuálaíochta chomh maith le rannpháirtíocht idirnáisiúnta a shainiú maidir le gnéithe éagsúla den intleacht shaorga.  Ina theannta sin, chomhaontaigh an tAontas agus an Astráil féachaint ar bhealaí chun geilleagar sonraí duinelárnach a chur chun cinn atá slán, idir-inoibritheach agus iontaofa. D’aithin na comhpháirtithe freisin gur féidir ról tábhachtach a bheith ag comhar idirnáisiúnta maidir leis an gcibearshlándáil chun cibearspás domhanda, oscailte, cobhsaí agus slán a choinneáil trí bhonneagar criticiúil a chosaint agus trí mhalartú maidir le bogearraí éirice agus feasacht staide. Sa chomhthéacs sin, phléigh an tAontas agus an Astráil nascacht shlán, lena n-áirítear cáblaí fomhuirí.

Ba é Roberto Viola, Ard-Stiúrthóir na Líonraí Cumarsáide, an Ábhair Dhigitigh agus na Teicneolaíochta, a d’oscail an tIdirphlé Digiteach sa Choimisiún Eorpach. Is iad Thibaut Kleiner, an Stiúrthóir um Straitéis Beartais agus For-rochtain in Ard-Stiúrthóireacht Líonraí Cumarsáide, Ábhair agus Teicneolaíochta an Choimisiúin Eorpaigh agus Helen Wilson, Leas-Rúnaí na hAstráile, a bhí ina gcomhchathaoirligh air.