Bhí an tArd-Stiúrthóir um Thrádáil, Sabine Weyand, agus an tArd-Stiúrthóir um Líonraí Cumarsáide, Ábhar agus Teicneolaíocht, Roberto Viola, ina gcomhchathaoirligh ar an gcruinniú ar thaobh an Aontais, agus an Fo-Rúnaí Stáit um Fhás Eacnamaíoch, Fuinneamh agus an Comhshaol, Jose Fernandez, Fo-Rúnaí Tráchtála um Thrádáil Idirnáisiúnta, Marisa Lago, agus Comhairleoir Sinsearach d’Ionadaí Trádála na Stát Aontaithe, Cara Morrow, ar thaobh na Stát Aontaithe.
Rinne an dá thaobh a marana ar an dul chun cinn atá déanta maidir leis an obair chomhpháirteach atá ar siúl i meithleacha éagsúla TTC. Leagadh béim sa phlé ar a thábhachtaí atá an comhar leanúnach maidir leis an intleacht shaorga, chomh maith le tábhacht na n-iarrachtaí leanúnacha chun imscaradh bonneagair dhigitigh shláin agus líonraí na chéad ghlúine eile a chur chun cinn. Mhol siad freisin na hiarrachtaí chun leanúint de dhul chun cinn a dhéanamh maidir le caighdeáin teicneolaíochta atá ag teacht chun cinn, lena n-áirítear maidir le céannacht dhigiteach.
Phléigh na hoifigigh freisin conas an comhar leanúnach maidir le slabhraí soláthair slána a chur chun cinn, go háirithe maidir le grianfhuinneamh agus leathsheoltóirí. D’athdhearbhaigh an tAontas agus na Stáit Aontaithe a thábhachtaí atá sé sreafaí trádála agus infheistíochta níos inbhuanaithe agus níos sláine a éascú agus a chur chun cinn ar fud an Atlantaigh. Áirítear leis sin sainaithint chomhpháirteach na sraitheanna comhair a d’fhéadfaí a fhorbairt faoin Tionscnamh Trasatlantach maidir leis an Trádáil Inbhuanaithe (TIST) bunaithe ar ionchur ó phobal na bpáirtithe leasmhara trasatlantacha agus ón Idirphlé Trádála agus Saothair. Chomhaontaigh an dá thaobh freisin leanúint de mhalartuithe dea-chleachtas maidir le scagadh infheistíochta.
Cuireadh clabhsúr ar an gcruinniú trí bhéim a leagan ar a thábhachtaí atá sé comhar láidir trasatlantach a choinneáil ar bun maidir le trádáil agus teicneolaíocht agus na naisc fhoriomlána idir an tAontas agus na Stáit Aontaithe a neartú a thuilleadh. Chomhaontaigh siad a thábhachtaí atá sé tuairimí a fháil ó pháirtithe leasmhara maidir leis na ceachtanna a foghlaimíodh agus maidir le todhchaí an chomhair trádála agus teicneolaíochta idir an tAontas agus na Stáit Aontaithe.
Tuilleadh eolais:
Digiteáil sa Chomhairle Trádála agus Teicneolaíochta idir an tAontas agus na Stáit Aontaithe