Ir-rapport “Kif nagħmlu d-Deċennju Diġitali Ewropew adatt għat-tfal u ż-żgħażagħ” jippreżenta s-sejbiet minn eżerċizzju ta’ konsultazzjoni trans-Ewropew #DigitalDecade4YOUth ikkoordinat mill-European Schoolnet — f’isem il-Kummissjoni Ewropea — bħala parti mill-inizjattiva www.betterinternetforkids.eu.
L-objettiv ewlieni tal-eżerċizzju ta’ konsultazzjoni #DigitalDecade4YOUth kien li jinkiseb fehim aħjar ta’ kif id-dinja diġitali taffettwa (id-drittijiet ta’) it-tfal u ż-żgħażagħ, dak li huma stess iqisu bħala opportunitajiet u sfidi ewlenin, u l-aspettattivi li jista’ jkollhom għal dawk li jfasslu l-politika.
Saru aktar minn 70 sessjoni ta’ konsultazzjoni bl-appoġġ tan-netwerk Insafe ta’ Ċentri Ewropej għal Internet Aktar Sikur u firxa usa’ ta’ skejjel u organizzazzjonijiet Ewropej dwar is-sikurezza online u d-drittijiet tat-tfal wara gwida u esperjenza reċenti dwar id-drittijiet tat-tfal li jinstemgħu fl-era diġitali. Bħala tali, l-ilħna ta’ aktar minn 750 tifel u tifla u żagħżugħ u żagħżugħa madwar l-Ewropa nstemgħu b’mod strutturat u sistematiku, li stabbilixxa standard għoli dwar kif tiġi żgurata l-parteċipazzjoni sinifikanti tat-tfal u taż-żgħażagħ fit-tfassil tal-politika diġitali.