Věra Jourová, il-Viċi President għall-Valuri u t-Trasparenza, qalet:
Id-diżinformazzjoni tnaqqar id-dibattitu demokratiku tagħna. It-trasparenza hija prekundizzjoni biex tinftiehem u tiġi miġġielda d-diżinformazzjoni online u r-rapporti jmorru fid-direzzjoni t-tajba. Barra minn hekk, ser inġeddu l-kodiċi ta’ prattika kontra d-diżinformazzjoni bi gwida prattika u qafas ta’ monitoraġġ permanenti.
Thierry Breton, il-Kummissarju għas-Suq Intern, żied jgħid:
It-tilqim huwa l-ogħla prijorità tagħna għall-Ewropej. Il-ġlieda kontra d-diżinformazzjoni dwar il-vaċċini kontra l-COVID-19 hija essenzjali biex tikkomplementa l-isforzi tagħna ta’ produzzjoni u tilqim. Fl-Ewropa qed jiġu prodotti u amministrati vaċċini sikuri u effiċjenti u ma nistgħux inħallu d-diżinformazzjoni timmina l-fiduċja. Il-pjattaformi għandhom responsabbiltà f’dan ir-rigward u jridu jerfgħu din ir-responsabbiltà.
Ir-rapporti juru li Twitter aġġorna t-tiftixa tiegħu għall-COVID-19 fl-UE biex jinkludi informazzjoni awtorevoli dwar il-vaċċini, u attiva l-hashtag #Vaccinated by 24 lingwa għall-utenti biex juru l-appoġġ tagħhom għat-tilqim.
TikTok nieda karatteristika ġdida li tqiegħed strixxun fuq vidjos li jwissi lill-utenti li jista’ jkun fihom kontenut mhux ivverifikat u li jwassal għal messaġġ qabel ma jaqsmu l-vidjo mmarkat.
Il-karatteristika Search ta’ Google, li turi informazzjoni affidabbli dwar il-vaċċini u l-istatistika bi tweġiba għal tfittxijiet relatati, issa hija attiva fis-27 pajjiż tal-UE u YouTube neħħa 30,000 filmat li inkludew dikjarazzjonijiet li jikkontradixxu l-kunsens fost l-awtoritajiet tas-saħħa.
Il-magna tat-tiftix tal-Microsoft Bing varat karatteristika ġdida li turi l-progress tat-tilqim tal-pajjiżi, u l-esperjenza tal-Bing COVID-19 kellha aktar minn 2,300,000 żjara.
Il-Kummissjoni tinsab f’kuntatt kontinwu mal-pjattaformi biex tkompli tindirizza l-ammont kbir ta’ diżinformazzjoni dwar il-vaċċini li tkompli tiċċirkola online u tirfina l-proċess ta’ monitoraġġ, inkluż dwar l-impatt tal-politiki tal-firmatarji wkoll biex tiżgura trasparenza u obbligu ta’ rendikont pubbliku suffiċjenti. Għal dan l-għan, fir-rebbiegħa l-Kummissjoni se toħroġ gwida bl-għan li ssaħħaħ il-Kodiċi ta’ prattika u tibni l-pont mal-obbligi futuri tal-Att dwar is-Servizzi Diġitali, kif stabbilit fil-Pjan ta’ Azzjoni għad-Demokrazija Ewropea tagħha.
Aktar informazzjoni
- Rapporti ġodda minn Twitter, TikTok, Google u Microsoft
- Il-kodiċi ta’ Prattika dwar id-Diżinformazzjoni