European Commission
Wara l-firem, u mat-tlestija tal-proċessi ta’ ratifika relatati, il-ftehimiet ta’ assoċjazzjoni ser jidħlu fis-seħħ. In-negozji, l-amministrazzjonijiet pubbliċi u organizzazzjonijiet eliġibbli oħra f’dawn il-pajjiżi ġirien se jkunu jistgħu jaċċessaw is-sejħiet tal-Programm Ewropa Diġitali, li għandu baġit globali ta’ EUR 7.5 biljun fil-perjodu 2021–2027.
B’mod partikolari, il-parteċipanti minn dawn l-erba’ pajjiżi se jkunu jistgħu jieħdu sehem fi proġetti li jużaw teknoloġiji diġitali madwar l-UE f’oqsma speċifiċi bħall-intelliġenza artifiċjali, u ħiliet diġitali avvanzati. Se jkunu jistgħu wkoll jistabbilixxu Hubs ta’ Innovazzjoni Diġitali fir-reġjuni tagħhom stess.
Dan se jressaqhom eqreb lejn l-ekonomija u s-soċjetà tal-UE, ikun ta’ benefiċċju għall-kapaċitajiet teknoloġiċi tagħhom u jappoġġa d-diġitalizzazzjoni b’mod ġenerali, b’mod partikolari tan-negozji żgħar u ta’ daqs medju.
Il-fondi tal-Programm Ewropa Diġitali se jikkomplementaw il-finanzjament disponibbli fil-Montenegro, fil-Maċedonja ta’ Fuq u fis-Serbja, kif ukoll fl-Albanija, permezz ta’ programmi oħra tal-UE bħal Orizzont Ewropa. L-objettivi u l-oqsma tematiċi speċifiċi li bħalissa huma eliġibbli għall-finanzjament huma spjegati fid-dettall fil-Programmi ta’ Ħidma.