L-Aġenzija tal-Unjoni Ewropea għaċ-Ċibersigurtà (ENISA) għandha l-mandat li tippromwovi sinerġiji u tassisti lill-Istati Membri u lill-istituzzjonijiet, il-korpi, l-uffiċċji u l-aġenziji tal-Unjoni fl-isforzi tagħhom biex jibnu u jtejbu l-kapaċitajiet u t-tħejjija għall-prevenzjoni, l-identifikazzjoni u r-rispons għal theddid u inċidenti ċibernetiċi, u tassisti fl-iżvilupp u l-implimentazzjoni tal-politiki rilevanti.
L-Uffiċċju Lokali tal-ENISA fi Brussell, il-Belġju għandu jiġi stabbilit bil-ħsieb li tiġi implimentata kooperazzjoni strutturata mas-CERT UE u li tinżamm kooperazzjoni regolari u sistematika mal-istituzzjonijiet, il-korpi u l-aġenziji tal-Unjoni inkluż iżda mhux limitat għas-CERT-UE, is-Servizz Ewropew għall-Azzjoni Esterna, l-Europol u l-Aġenzija Ewropea għad-Difiża u/jew korpi kompetenti oħra involuti fiċ-ċibersigurtà, sabiex jibbenefikaw minn sinerġiji u jevitaw id-duplikazzjoni tal-attivitajiet.
Il-Bord tat-Tmexxija tal-Aġenzija tal-Unjoni Ewropea għaċ-Ċibersigurtà jiddelega lid-Direttur Eżekuttiv tal-Aġenzija s-setgħat relatati biex jiżgura l-istabbiliment bla xkiel tal-uffiċċju lokali fi Brussell, il-Belġju. Huwa se jassenja wkoll persunal għall-Uffiċċju Lokali tal-ENISA fi Brussell skont il-ħtiġijiet tal-Aġenzija u l-ambitu tal-attivitajiet meħtieġa.